Мелис Абзалов

Мелис Арипович Абзалов 1938-йил 18-ноябрда Тошкент вилоятининг Янгийўл шаҳрида туғилган. 1956-йилда А. Н. Островский номидаги Тошкент театр ва рассомлик институтига ўқишга кириб, 1961-йилда уни тамомлаган. Талабалик йилларидаёқ Тошкент Ёш томошабинлар театри саҳнасида ўйнаган, институтдан сўнг шу театр труппасига қабул қилинган.

Тахминан бир йилдан кейин театрдан кинога ўтган: 1962-йилдан «Ўзбекфилм» киностудиясида режиссёр ёрдамчиси ва актёр бўлиб ишлаган. 1970–1972-йилларда Москвада СССР Давлат кинематография қўмитаси ҳузуридаги сенарийчилар ва режиссёрларнинг олий курсларида ўқиган, сўнг яна «Ўзбекфилм»га қайтиб, режиссёрлик ва актёрлик фаолиятини давом эттирган.

Режиссёр сифатидаги дастлабки мустақил иши — «Чинор тагидаги дуэл» филми (1979). Кейинги йилларда комедия жанрида ишлаган: «Суюнчи» (1982), Саид Аҳмаднинг песаси асосидаги «Келинлар қўзғолони» (1985), «Армон» (1986), Ҳамзанинг комедияси асосидаги «Майсаранинг иши» (1989) филмларини суратга олган. «Келинлар қўзғолони» ўзбек киносининг энг севилган комедияларидан бирига айланган.

Мустақиллик йилларида Абдулла Қодирийнинг романи асосидаги «Ўтган кунлар» (1997) филмини суратга олди — унда ссенарий муаллифи ҳам ўзи эди; кейинроқ «Чимилдиқ», «Барибир ҳаёт гўзал» (2004), «Сирли сиртмоқ» (2008) ва «Таъзиядаги тўй» (2010) филмларини яратди. Актёр сифатида қирққа яқин филмда рол ўйнаган, жумладан «Қўқон воқеаси» филмида Эшон Зайнулло, «Арслоннинг саргузаштлари»да Қорашоҳ образларини яратган.

Абзалов Ўзбекистон ССР хизмат кўрсатган санъат арбоби (1987) унвонига сазовор бўлган, 2008-йилда «Меҳнат шуҳрати» ордени билан мукофотланган. Умрининг сўнгги йилларини Стокголмда, қизи Назира оиласи ёнида ўтказган ва 2016-йил октабрида ўша ерда юрак хуружидан вафот этган.