Қувондиқ Искандаров

Қувондиқ Искандаров — Хоразм мақом ва анъанавий ашула ижрочиси, ҳофиз. У Хоразм вилоятининг Ҳазорасп туманида туғилган. Ашула санъатини аввал Озод Жабборовдан ўрганган, кейинроқ Ҳожихон Болтаев ва Нурмуҳаммад Болтаевлардан ўрганиб, Ҳожихон Болтаев мактабини давом эттирган ҳофизлардан бири ҳисобланади.

1958-йилдан 1985-йилгача Ўзбекистон давлат филармониясининг «Хоразм» ва «Лазги» ансамблларида яккахон хонанда бўлган. Осиё мамлакатларида гастрол сафарларида бўлган; ижролари грампластинкаларга ва Ўзбекистон радиоси фонотекасига ёзилган.

Репертуарида Хоразм мақомининг «Феруз» туркуми, «Сегоҳ», «Дугоҳ», «Оразибон», «Катта Сувора» каби бўлимлари, Фарғона–Тошкент мақом йўлларидан «Танавор», «Ғирё», «Таманно» ҳамда туркман ва озарбайжон халқ қўшиқлари бор. «Суҳбатлашайлик», «Учралим», «Узоқдасан», «Иккимиз», «Қайласан», «Индамас Сувора» ашулаларига мусиқа басталаган.

1999-йилдан Тошкент мусиқа билим юртида ва Ўзбекистон консерваториясида дарс берган. Шогирдлари орасида И. Ф. Давлетов, М. Дадабоева, Р. Қурбонов, А. Дадаев, О. Оллаберганов, Г. Ғоибова, Ш. Матёқубов номлари тилга олинади. 1998-йилда унга Ўзбекистон халқ ҳофизи унвони берилган.