Салим Ашур

Салим Ашур (Ашуров) 1964-йил 16-декабрда Тожикистон ССРнинг Қўрғонтепа вилояти Қўрғонтепа туманида деҳқон оиласида туғилган. Кўп ўтмай ота-онаси Сурхондарё вилоятининг Қизириқ туманига кўчиб ўтган, болалик ва ўсмирлик йиллари шу ерда кечган. Илк шеърларини ҳали 6-синфда ўқиётган пайтида туман газетасида эълон қилган, республика матбуотида эса 1979-йилда «Гулхан» журналида дебют қилган.

1982-йилда мактабни тугатгач, Тошкент давлат университетининг журналистика факултетига ўқишга кирган ва уни 1989-йилда битирган. 1990–1994-йилларда «Саодат» журналида, 1994–1996-йилларда «Ўзбекистон овози» газетасида ишлаган. Кейинроқ «Туркистон» газетасига бош муҳаррирлик қилган.

Биринчи тўплами — «Яшил гиёҳ» — 1994-йилда нашр этилган, ўша йили «Атиргул» китоби ҳам чиққан. Сўнг «Сиз эртага келасиз» (1999), «Кечиккан тонг» (2002), «Аталган кунлар» (2004) ва «Дарз» (2006) китоблари босилган.

Ашур таржимон сифатида ҳам танилган: у Александр Блок, Иван Бунин ва Афанасий Фет шеърларини, Жан-Пол Сартр ва Константин Паустовскийнинг қисса ҳамда ҳикояларини ўзбек тилига ўгирган.

2012-йилда унга «Ўзбекистонда хизмат кўрсатган журналист» фахрий унвони берилган. 2014-йилдан Ўзбекистон Республикаси Президенти Администрациясида ишлаган; 2018-йил октабрда оммавий ахборот воситалари, телевидение ва матбуотни ривожлантириш бўлими мудири этиб тайинланган, 2019-йил октабрда эса «Ўзбекистон адабиёти ва санъати» газетасининг бош муҳаррири бўлган.