Юлдуз Ҳамидова

Юлдуз Ҳамидова 1964-йил 10-ноябрда туғилган. 1989-йилда Тошкент театр ва рассомлик институтини тамомлаган ва шу заҳоти «Ўзбекфилм» киностудиясида ишлай бошлаган. Ўзбекистон хизмат кўрсатган артисти фахрий унвонига эга.

Экранда турли жанрдаги филмларда рол ўйнаган: «Тангалик болалар», «Ёдгор», «Сугдиёна», «Чавандоз», «Фарёд», «Армон», «Шабнам», «Жаноб ҳеч ким», «Хазон» ва бошқалар. «Туташ тақдирлар» сериалида (2009) Наргизанинг онаси Муниса ролини ижро этган; бу рол томошабинлар хотирасида қолган. 2013-йилда «Гулчатай. Ради любви» сериалида Жамила ролида иштирок этган, 2019-йилда режиссёр Музаффар Эркиновнинг «Саодат» сериалида суратга тушган.