Aleksandr Pann

Aleksandr Mixaylovich Pann 1914-yil 25-martda Xarkov guberniyasining Lozovoye qishlog'ida tug'ilgan. 1933-yilda Kiyevdagi poligrafiya fabrika-zavod o'quv yurtini, 1940-yilda Moskvadagi VGIKning operatorlik fakultetini tamomlagan.

Ulug' Vatan urushida Zakavkaz havo mudofaasi zonasidagi 335-zenit-artilleriya polkida xizmat qilgan, katta leytenant unvonigacha ko'tarilgan.

1946-yildan Toshkent kinostudiyasida hujjatli film operatori bo'lib ishlagan, «Sovet O'zbekistoni» va «Yangiliklar kuni» kinojurnallari uchun lavhalar suratga olgan; «Farg'ona qizi» filmida operator Vasiliy Sibirsevga yordamchi bo'lgan. 1955-yildan «O'zbekfilm»da badiiy film operatori bo'lib, 30 ga yaqin film suratga olgan: «Stadionda uchrashamiz», «Qutlug' qon», «Ulug'bek yulduzi», «Qizil qumlar», «Yettinchi o'q», «Semurg'», «Chinor tagidagi duel» va boshqalar.

1966-yilda O'zbekiston SSRning faxriy unvoni berilgan. I darajali Vatan urushi ordeni (1985), «Mehnatdagi namunasi uchun» medali (1959) va boshqa medallar bilan taqdirlangan.

1993-yil 21-fevralda Sankt-Peterburgda vafot etgan.