Александр Панн

Александр Михайлович Панн 1914-йил 25-мартда Харков губерниясининг Лозовое қишлоғида туғилган. 1933-йилда Киевдаги полиграфия фабрика-завод ўқув юртини, 1940-йилда Москвадаги ВГИКнинг операторлик факултетини тамомлаган.

Улуғ Ватан урушида Закавказ ҳаво мудофааси зонасидаги 335-зенит-артиллерия полкида хизмат қилган, катта лейтенант унвонигача кўтарилган.

1946-йилдан Тошкент киностудиясида ҳужжатли филм оператори бўлиб ишлаган, «Совет Ўзбекистони» ва «Янгиликлар куни» киножурналлари учун лавҳалар суратга олган; «Фарғона қизи» филмида оператор Василий Сибирсевга ёрдамчи бўлган. 1955-йилдан «Ўзбекфилм»да бадиий филм оператори бўлиб, 30 га яқин филм суратга олган: «Стадионда учрашамиз», «Қутлуғ қон», «Улуғбек юлдузи», «Қизил қумлар», «Еттинчи ўқ», «Семурғ», «Чинор тагидаги дуэл» ва бошқалар.

1966-йилда Ўзбекистон ССРнинг фахрий унвони берилган. I даражали Ватан уруши ордени (1985), «Меҳнатдаги намунаси учун» медали (1959) ва бошқа медаллар билан тақдирланган.

1993-йил 21-февралда Санкт-Петербургда вафот этган.