Bahodir Karim

Bahodir Karim (Bahodir Nurmetovich Karimov) 1966-yil 7-fevralda Turkmaniston SSRning Toshhovuz viloyatidagi Toza-yormish qishlog'ida ziyoli oilada tug'ilgan; otasi Nurmat fizika o'qituvchisi bo'lgan. Qishloqdagi 30-maktabni 1983-yilda tugatgan.

1986–1991-yillarda Toshkent davlat universiteti (hozirgi O'zbekiston milliy universiteti)ning o'zbek filologiyasi fakultetida o'qigan, so'ng 1991–1994-yillarda shu universitetda aspiranturada tahsil olgan. 1995-yilda akademik Baxtiyor Nazarov rahbarligida «Vadud Mahmudning 20-yillar adabiy tanqidchiligidagi o'rni» mavzusida nomzodlik dissertatsiyasini himoya qilgan, 2002-yilda professor Umarali Normatov ilmiy maslahatchiligida «XX asr o'zbek adabiyotshunosligida talqin muammosi» mavzusidagi doktorlik dissertatsiyasini yoqlagan.

1999-yildan O'zbekiston milliy universitetida «Jahon adabiyoti va nazariya» kafedrasini boshqargan, 2003–2006-yillarda o'zbek filologiyasi fakultetining dekani bo'lgan, 2001-yildan universitet huzuridagi Oliy adabiyot kursiga rahbarlik qilgan. Hozir Alisher Navoiy nomidagi Toshkent davlat o'zbek tili va adabiyoti universitetida filologiya fanlari doktori, professor, «Adabiyot nazariyasi va zamonaviy adabiy jarayon» kafedrasi mudiri.

Uning tadqiqotlari asosan XX asr o'zbek adabiyoti, jadidlar merosi, adabiyotshunoslik metodologiyasi va germenevtika masalalariga bag'ishlangan. Bahodir Karim Abdulla Qodiriy, Cho'lpon va jadid munaqqidi Vadud Mahmud haqidagi kitoblar, XX asr o'zbek hikoyasi va she'riyati antologiyalari muallifi; universitet ma'lumotlariga ko'ra, 450 dan ortiq ilmiy maqola e'lon qilgan va o'z shogirdlaridan ikki fan doktori hamda o'nlab fan nomzodi va PhD yetishgan.

2005-yildan O'zbekiston Yozuvchilar uyushmasi a'zosi. 2016-yilda «Xalq ta'limi a'lochisi» ko'krak nishoni bilan mukofotlangan, 2020-yilda unga «O'zbekistonda xizmat ko'rsatgan yoshlar murabbiysi» faxriy unvoni berilgan.