Darvishbek Rahmonov

Darvishbek Rahmonov 1952-yilda Qirg'iziston SSRning O'sh shahrida tug'ilgan. Uning otasi — O'sh Bobur nomidagi musiqali drama teatrining asoschisi Urinboy Rahmonov. Darvishbek teatr emas, sirk san'atini tanlagan.

1970-yillarning o'rtalarida u O'shda polvonlar guruhi bilan tanishib, kuch ko'rsatuvchi polvon sifatida chiqish boshlagan: tosh ko'tarish, zanjir uzish, temir egish uning nomerlari qatoriga kirgan. Keyinchalik dasturiga illyuzion va gipnoz ko'rsatuvlarini ham qo'shgan. 1979-yilda To'lqin Obidovning «O'zbek polvonlari» kitobida u haqida ma'lumot va suratlar bosilgan.

1978-yilda Toshkent estrada va sirk san'ati studiyasiga o'qishga kirgan va uni 1981-yilda tamomlagan. O'sha davrda bu muassasa SSSRda estrada va sirk yo'nalishidagi uchta o'quv yurtidan biri bo'lgan.

1981-yilda Rahmonov Toshkent viloyatining Yangiyo'l tumanida tuman madaniyat bo'limi qoshida «Qaldirg'och» namunali sirk truppasini tuzdi va uning badiiy rahbari bo'ldi. Truppa Butunittifoq ko'rik-tanlovlari sovrindori, 1986-yilda Toshkent viloyati komsomol mukofoti laureati bo'lgan, respublika ko'rik-tanlovlarida to'rt marta birinchi, ikki marta ikkinchi o'rinni egallagan.

«Qaldirg'och» shogirdlari orasida chet ellardagi professional sirklarda chiqish qilayotganlar bor, ulardan biri — To'ychi Xon nomi bilan tanilgan To'ychi Tojiboyev. Truppa chet elga ijodiy safarlarga chiqqan, O'zbekiston televideniyesida ko'rsatilgan.

2002-yil 26-avgustda O'zbekiston Respublikasi Prezidentining farmoniga binoan Rahmonov san'at va madaniyatni rivojlantirishga qo'shgan hissasi uchun «Shuhrat» medali bilan taqdirlangan.