Дарвишбек Раҳмонов

Дарвишбек Раҳмонов 1952-йилда Қирғизистон ССРнинг Ўш шаҳрида туғилган. Унинг отаси — Ўш Бобур номидаги мусиқали драма театрининг асосчиси Уринбой Раҳмонов. Дарвишбек театр эмас, цирк санъатини танлаган.

1970-йилларнинг ўрталарида у Ўшда полвонлар гуруҳи билан танишиб, куч кўрсатувчи полвон сифатида чиқиш бошлаган: тош кўтариш, занжир узиш, темир эгиш унинг номерлари қаторига кирган. Кейинчалик дастурига иллюзион ва гипноз кўрсатувларини ҳам қўшган. 1979-йилда Тўлқин Обидовнинг «Ўзбек полвонлари» китобида у ҳақида маълумот ва суратлар босилган.

1978-йилда Тошкент эстрада ва цирк санъати студиясига ўқишга кирган ва уни 1981-йилда тамомлаган. Ўша даврда бу муассаса СССРда эстрада ва цирк йўналишидаги учта ўқув юртидан бири бўлган.

1981-йилда Раҳмонов Тошкент вилоятининг Янгийўл туманида туман маданият бўлими қошида «Қалдирғоч» намунали цирк труппасини тузди ва унинг бадиий раҳбари бўлди. Труппа Бутуниттифоқ кўрик-танловлари совриндори, 1986-йилда Тошкент вилояти комсомол мукофоти лауреати бўлган, республика кўрик-танловларида тўрт марта биринчи, икки марта иккинчи ўринни эгаллаган.

«Қалдирғоч» шогирдлари орасида чет эллардаги профессионал циркларда чиқиш қилаётганлар бор, улардан бири — Тўйчи Хон номи билан танилган Тўйчи Тожибоев. Труппа чет элга ижодий сафарларга чиққан, Ўзбекистон телевидениесида кўрсатилган.

2002-йил 26-августда Ўзбекистон Республикаси Президентининг фармонига биноан Раҳмонов санъат ва маданиятни ривожлантиришга қўшган ҳиссаси учун «Шуҳрат» медали билан тақдирланган.