Hilola Umarova

Hilola Oktamovna Umarova 1988-yil 9-avgustda Germaniyada, Veymar shahrida tug'ilgan. Jahon iqtisodiyoti va diplomatiya universitetini tamomlagan: 2010-yilda bakalavr, 2013-yilda tashqi iqtisodiy faoliyat yo'nalishida magistr darajasini olgan. 2014-yildan Toshkentdagi Inha universitetida ishlagan, 2019-yilda universitetda tadbirkorlik, innovatsion g'oyalar va texnologiyalarni qo'llab-quvvatlash bo'yicha bosh menejer bo'lgan.

2019–2020-yillarda Muhammad al-Xorazmiy nomidagi ixtisoslashtirilgan maktabga rahbarlik qildi. 2020-yil 8-oktyabrdagi Prezident farmoni bilan Vazirlar Mahkamasi huzuridagi Prezident, ijod va ixtisoslashtirilgan maktablarni rivojlantirish agentligi direktori etib tayinlandi va 2022-yilgacha shu lavozimda ishladi.

2022-yil 30-dekabrda yangi hukumat tarkibida maktabgacha va maktab ta'limi vaziri etib tayinlandi; 2024-yil noyabrida yangi hukumatda ham o'z lavozimini saqlab qoldi. 2025-yil 14-iyulda vazirlik lavozimidan ozod etilib, Prezident Administratsiyasi rahbarining ta'lim tizimini isloh qilish bo'yicha o'rinbosari etib tayinlandi.

2026-yil 16-fevralda bu lavozimdan ozod qilindi (o'rniga Ilhom Sirajev tayinlandi), 17-fevralda esa Maktabgacha va maktab ta'limi vazirining pedagogik ta'limni rivojlantirish bo'yicha o'rinbosari va Nizomiy nomidagi O'zbekiston milliy pedagogika universiteti rektori etib tayinlandi. 2026-yil 2-oktyabrdagi Prezident qaroriga ko'ra vazir o'rinbosarining bu lavozimi vazirlik markaziy apparatidan chiqarildi, universitet esa Nizomiy Ganjaviy nomi bilan qayta nomlandi.