Muzraf Ikromov

Muzraf Muborakxo'jayevich Ikromov 1973-yil 14-sentabrda Toshkentda tug'ilgan. 1995-yilda Toshkent davlat yuridik institutini (hozirgi universitetini) huquqshunos mutaxassisligi bo'yicha, 2007-yilda O'zbekiston Respublikasi Prezidenti huzuridagi Davlat va jamiyat qurilishi akademiyasini tamomlagan.

Mehnat faoliyatini 1995-yilda Adliya vazirligida boshlagan: iqtisodiy islohotlar sohasidagi qonun va me'yoriy hujjatlar loyihalarining huquqiy ekspertizasini o'tkazuvchi boshqarmada katta, keyin bosh maslahatchi bo'lgan. 1997–2003-yillarda idoraviy me'yoriy hujjatlarni davlat ro'yxatidan o'tkazish bo'limi, so'ng boshqarmasiga rahbarlik qilgan va Qonunchilik bosh boshqarmasi boshlig'i vazifasini bajargan. 2003–2008-yillarda vazirlikning Qonunchilik bosh boshqarmasi va uning huzuridagi Huquqiy axborot bilan ta'minlash markazi boshlig'i bo'lgan.

2008–2012-yillar davomida Vazirlar Mahkamasidagi xalqaro shartnomalar va huquqiy ekspertiza boshqarmasi huquqiy ekspertiza bo'limini boshqargan. 2012–2013-yillarda Prezident devonida Oliy Majlis Qonunchilik palatasi va Senati bilan hamkorlik qilish bo'yicha shu'ba mudiri bo'lib ishlagan. 2013-yildan Adliya vazirining birinchi o'rinbosari edi.

2015-yil 11-fevraldagi Prezident farmoni bilan Ikromov Adliya vaziri etib tayinlangan va bu lavozimda 2017-yil avgustigacha ishlagan. 2017-yil avgustida Hisob palatasi raisi bo'lib, 2019-yil martigacha unga rahbarlik qilgan.

2019–2020-yillarda Qashqadaryo viloyat adliya boshqarmasi boshlig'i bo'lgan. 2020-yil mayida Prezident qarori bilan O'zbekiston Respublikasi adliya vazirining o'rinbosari etib tayinlangan.

2007-yilda «Shuhrat» medali bilan taqdirlangan, Prezidentning 2014-yil 25-avgustdagi farmoni bilan unga «O'zbekiston Respublikasida xizmat ko'rsatgan yurist» faxriy unvoni berilgan.