Nargiz Zakirova

Nargiz Zakirova 1970-yil 6-oktabrda Toshkentda musiqachilar oilasida tug'ilgan. Onasi — 1960–1970-yillarda mashhur bo'lgan estrada xonandasi Luiza Zokirova, tog'asi — o'zbek estradasining asoschilaridan biri Botir Zokirov. U to'rt yoshida sahnaga chiqqan, 1980-yillarda respublika sirk bilim yurtining estrada bo'limida o'qigan va o'z guruhi bilan chiqish qilgan.

1986-yilda Ali Hamrayev filmi uchun yozilgan «Pomni menya» qo'shig'i bilan yosh ijrochilarning butunittifoq «Yurmala-86» telekonkursida tomoshabinlar mukofotini olgan. 1995-yilda oilasi bilan AQShga ko'chib, Nyu-Yorkda yashab, restoranlarda, turli guruhlarda va yakkaxon chiqish qilgan; «Zolotaya kletka» (2005), «Alone» (2011) albomlarini chiqargan.

2013-yilda Rossiya Birinchi kanalining «Golos» teleko'rsatuvida Leonid Agutin jamoasida qatnashib, finalga chiqdi va ikkinchi o'rinni egalladi. 2014-yildan prodyuser va kompozitor Maksim Fadeev bilan hamkorlik qildi: «Ya — ne tvoya» (2014), «Ty — moya nejnost» (2015), «Ya ne veryu tebe!» (2015), «Begi» (2016) singllari va «Shum serdtsa» (2016) albomi shu davrda chiqdi. 2014-yilda «Sankt-Peterburg oq tunlari» xalqaro musiqa festivalining Grand-prisini olgan.

2017-yilda «Muz-TV» mukofotida «Eng yaxshi rok ijrochi» va (Fadeev bilan «Vdvoyom» qo'shig'i uchun) «Eng yaxshi duet» nominatsiyalarida g'olib bo'lgan.