Ochilxon Otaxonov

Ochilxon Otaxonov — hofiz, mumtoz ghazal va maqom ijrochisi. U Andijon viloyati Shahrixon tumanidagi Naynavo qishlog'ida dehqon oilasida tug'ilgan. 1940-yillarda oilasi Toshkent viloyati Yangiyo'l tumanidagi Sho'ralisoy qishlog'iga ko'chgan; u otasi bilan kolxozda ishlagan.

13–14 yoshlarida Jo'raxon Sultonov va Ma'murjon Uzoqov gramplastinkalarini tinglab ashulalarni o'rgangan. Kolxoz raisi Hamroqul Tursunqulov uning iste'dodini payqab, havaskorlik to'garagiga jalb qilgan; to'garakda Jalil Maxsumdan dutor va ashula o'rgangan. Ovoz texnikasini tog'alari Eshonboboxon, Ko'kxon va Afandixondan o'rgangan.

1959-yildan Yangiyo'l teatrida, 1978–1986-yillarda Yunus Rajabiy nomidagi «Maqom» ansamblida ishlagan. Navoiy, Fuzuliy, Bobur, Ogahiy, Furqat, Muqimiy, Zavqiy, Habibiy, Charxiy, Haziniy g'azallarini mumtoz kuylarda ijro etgan; Navoiy g'azallariga «Sayqal», «Talqin Bayot», «Sarahbori oromijon», «Talqinchai mustahzodi navo» kuylarini yaratgan. Bobur («Topmadim»), Muqimiy («Kim desun»), Mashrab («Jonima rohat»), Haziniy («Farg'ona tong otguncha», «Qalandar») g'azallari ijrolari O'zbekiston teleradiosining «Oltin fond»ida saqlanadi.

Repertuarida Shashmaqom bo'limlari, Farg'ona–Toshkent maqom yo'llari, mumtoz ashulalar va zamonaviy bastakorlar asarlari bor. U Vosit Sa'dulla, Habibiy, Akmal Po'lat, Ma'ruf Qoriyev she'rlariga ham ashulalar ijro etgan. 1992-yilda unga O'zbekiston xalq hofizi unvoni berilgan.