O'tkir Sultonov

O'tkir To'xtamurodovich Sultonov 1939-yil 14-iyulda Toshkentda tug'ilgan. 1963-yilda Tomsk politexnika institutini elektromexanik muhandis mutaxassisligi bo'yicha tugatgan, texnika fanlari nomzodi. 2001-yilda Tomsk politexnika universitetining faxriy professori bo'lgan.

1963-yilda Tomsk kesuvchi metall asboblar zavodida elektrik bo'lib ishlagan, 1964–1985-yillarda V. P. Chkalov nomidagi Toshkent aviatsiya ishlab chiqarish birlashmasida usta, laboratoriya boshlig'i, bosh konstruktorlik byurosi boshlig'i, bo'lim boshlig'i, bosh muhandis va bosh direktor o'rinbosari lavozimlarigacha ko'tarilgan. 1978–1979-yillarda Fransiyada xizmat safarida bo'lgan. 1985–1991-yillarda Toshkent «Vostok» ilmiy-ishlab chiqarish birlashmasi bosh direktori edi. O'zbekiston SSR Oliy Kengashi xalq deputati bo'lgan.

Mustaqillikdan so'ng 1991–1992-yillarda tashqi savdo va xorijiy aloqalar davlat qo'mitasi raisi, 1992-yil fevralidan tashqi iqtisodiy aloqalar vaziri, 1992–1995-yillarda Bosh vazir Abdulhoshim Mutalov o'rinbosari bo'lgan; O'zbekiston Xalq demokratik partiyasining asoschilaridan biri.

1995-yil 21-dekabrdan 2003-yil dekabrigacha O'zbekiston Respublikasining Bosh vaziri (ikkinchi) bo'lgan, 1998-yil mayidan MDH hukumat boshliqlari kengashi raisi edi. 2003-yil dekabridan 2006-yil noyabrigacha Bosh vazir o'rinbosari, so'ng Bosh vazir maslahatchisi va Toshkent aviatsiya ishlab chiqarish birlashmasi bosh direktori; 2011-yil yanvaridan nafaqada.

«Mehnat shuhrati» ordeni va medallar bilan taqdirlangan, O'zbekistonda xizmat ko'rsatgan muhandis unvoniga ega bo'lgan. 2015-yil 29-noyabrda Toshkentda 76 yoshida vafot etgan.