Qo'chqor Norqobil

Qo'chqor Norqobil 1968-yil 5-martda Surxondaryo viloyatining Oltinsoy tumanidagi Mo'minqul qishlog'ida tug'ilgan. O'rta maktabni tugatgach, 1986–1988-yillarda Afg'onistondagi urushda qatnashgan.

Keyin Toshkent davlat universitetining (hozirgi O'zbekiston Milliy universiteti) jurnalistika fakultetida o'qib, 1992-yilda uni tamomlagan. Gazeta va jurnallarda muxbir bo'lib ishlagan, «O'zbekiston ovozi» gazetasida siyosat va xalqaro hayot bo'limiga boshchilik qilgan.

Ijodi 1980-yillar oxiri — 1990-yillar boshida boshlangan: «Bosinqirash», «Asorat», «Xun» hikoyalari shu davrda yozilgan. She'riyatda «Xosiyatli dunyo» (1992) va «Kaftimdagi qizg'aldoq» (1993) to'plamlari bilan tanilgan.

Nasrida Afg'on urushi mavzusi asosiy o'rinlardan birini egallaydi. «Daryo ortidagi yig'i» qissasida (1994) muallif Afg'onistonda o'z ko'zi bilan ko'rgan voqealarni tasvirlagan; asar Usmon Nosir nomidagi mukofotga sazovor bo'lgan. Shu mavzu «Afg'on: 2 rota», «Biz jangdan qaytmadik…», «Olislarda osmon yo'q edi» kitoblarida davom etgan. «Kulib tur, azizim» (2005), «Qorong'u uy», «Xayr, beshinchi mart» kabi hujjatli qissa va romanlarida urush va inson, hayot va o'lim mavzulari yoritilgan.

Norqobil dramaturg sifatida ham ishlaydi: pyesalari respublika va viloyat teatrlarida sahnalashtirilgan. 2025-yilda Muqimiy nomidagi O'zbekiston davlat akademik musiqali teatrida Madaniyat vazirligi va Yozuvchilar uyushmasi loyihasi doirasida uning «She'riyatning mangu sadosi» sahna asari qo'yilgan.

2001-yilda unga O'zbekistonda xizmat ko'rsatgan jurnalist unvoni berilgan. Kitoblari Rossiyada ham chop etilgan; 2022-yilda Rossiya Davlat Dumasi Jamoat palatasi va Rossiya Xalqaro yozuvchilar uyushmasi uni «Muqaddas Anna» ordeni bilan taqdirlagan, o'sha yili «Moskvaning oltin qalami» xalqaro festivalining nasr tanlovida birinchi o'rinni olgan. O'zbekiston Yozuvchilar uyushmasi a'zosi.