Ruslan Nurudinov

Ruslan Shamilyevich Nurudinov 1991-yil 24-noyabrda Andijon viloyatida tug'ilgan o'zbekistonlik og'ir atletikachi. Xalqaro maydondagi dastlabki g'alabasini 2009-yilda Birlashgan Arab Amirliklarida o'tgan o'smirlar o'rtasidagi Osiyo chempionatida qozongan; 2011-yilda jahon chempionatida siltab ko'tarishda kumush medal olgan, 2012-yilda Osiyo chempioni bo'lgan.

2013-yilda Polshaning Vrotslav shahrida bo'lgan jahon chempionatida 105 kg vazn toifasida g'olib bo'lgan (siltab ko'tarishda 190 kg, turtib ko'tarishda 235 kg, jami 425 kg) — O'zbekiston tarixida og'ir atletika bo'yicha birinchi jahon chempioni. O'sha yili Osiyo chempionatida va Jahon universiadasida ham g'olib bo'lgan. 2014-yilda Olmaotadagi jahon chempionatida turtib ko'tarishda 239 kg bilan jahon rekordini yangilab, jamida kumush medal olgan.

2016-yilgi Rio Olimpiadasida siltab ko'tarishda 194 kg, turtib ko'tarishda 237 kg (Olimpiada rekordi) natijalari bilan jami 431 kg bilan oltin medalni qo'lga kiritgan. 2018-yilda Ashxobodda 109 kg toifasida turtib ko'tarishda bronza medal olgan. 2022-yilda Bogotada (jami 397 kg), 2024-yil dekabrida Manamada (jami 424 kg; turtib ko'tarishda 242 kg — jahon rekordi) jahon chempioni bo'lgan; 2023-yilda Jahon chempionatida kumush medal (407 kg), Osiyo chempionatida (Chinju, 405 kg) oltin medal olgan. 2013-yil 30-oktyabrdagi Prezident farmoni bilan «O'zbekiston iftixori» faxriy unvoni berilgan.