Sardor Rashidov

Sardor Ixtiyorovich Rashidov 1991-yil 14-iyunda Jizzaxda tug'ilgan. Karyerasini Jizzax «Sogdiana»sida boshlagan (2007–2008), 2009-yildan «Bunyodkor» akademiyasi tarbiyalanuvchisi sifatida o'ynadi; 2012-yildan jamoaning asosiy futbolchilaridan biri bo'ldi. Klub bilan O'zbekiston chempionatini (2010, 2011, 2013), kubogini (2010, 2012, 2013) va 2014-yilgi Superkubokni yutdi, 2012-yilda Osiyo Chempionlar ligasi yarim finalida o'ynadi.

2015–2017-yillarda Qatarning «Al-Jaysh» klubida o'ynadi (48 o'yin, 23 gol), 2017-yilda BAAning «Al-Jazira» klubida bo'ldi. 2018-yilda Toshkent «Lokomotiv»iga qaytib, klub bilan O'zbekiston Superligasi chempioni bo'ldi. Keyingi yillarda Portugaliyaning «Nasional» (2019), Qatarning «Qatar SC» (2019–2020), «Paxtakor» (2021, 2022, 2023–2024), «Umm-Salal» (2022–2023), «Navbahor» (2024–2025) klublarida va Dubay hamda Nepal klublarida o'ynadi.

O'zbekiston terma jamoasida 2013-yildan o'ynaydi; 2013-yil oktyabrida Vetnamga qarshi 2015-yilgi Osiyo kubogi saralash o'yinida debyut qilib, gol urgan (3:1). 2015-yilgi Osiyo kubogida qatnashdi: guruh bosqichining Saudiya Arabistoniga qarshi hal qiluvchi o'yinida (3:1) ikkita gol urdi; 2019-yilgi Osiyo kubogi tarkibiga ham kiritilgan. 2026-yil 31-yanvar holatiga 50 o'yin va 13 gol. 2015-yilda O'zbekistonda yilning eng yaxshi futbolchisi so'rovida ikkinchi o'rinni egallagan.