Shoyim Bo'tayev

Shoyim Bo'tayev 1959-yil 20-iyunda Tojikistonning O'ratepa tumanidagi Maydoncha qishlog'ida tug'ilgan. 1976-yilda o'rta maktabni, 1982-yilda Leninobod (hozirgi Xo'jand) davlat pedagogika institutining tarix-filologiya fakultetini tamomlagan.

Mehnat faoliyatini «Guliston» jurnalida boshlagan, keyin «Tong yulduzi» gazetasida bo'lim mudiri, «Cho'lpon» nashriyotida muharrir bo'lib ishlagan. O'zbekiston radiosining «Adabiyot va radioteatr» bosh tahririyatida va «O'zbektelefilm» studiyasida bosh muharrir lavozimlarini egallagan; O'zbekiston Respublikasi hujjatli va ilmiy-ommabop filmlar kinostudiyasida ham uzoq yillar bosh muharrir bo'lgan. Keyinchalik «Cho'lpon» nomidagi nashriyot-matbaa ijodiy uyida bosh muharrir o'rinbosari bo'lib ishlagan.

Adabiyotga 1980-yillarning o'rtalarida kirib kelgan. Ilk qissasi «Sirli yulduzlar» 1984-yilda «Sharq yulduzi» jurnalida bosilgan, o'sha yili «Dunyoning sarhisobi bor» qissalar to'plami chop etilgan. Keyin «Endi bari boshqacha» hikoyalar to'plami (1988) va «Shamol o'yini» qissa va hikoyalar majmuasi (1995) nashr qilingan.

«Qo'rg'onlangan oy» romani 1996-yilda chiqqan. Uning kitoblari qatorida «Kunbotardagi bog'», «Hayot», «Ko'chada qolgan ovoz» to'plamlari, «Shoh» va «Yettinchi tong» romanlari bor. Shuningdek, «Shukur Burhon», «Odil Yoqubov fenomeni», «Shukur, ayt-chi bu hayot nima?» (Shukur Xolmirzayev haqida) esselari yozgan; I. V. Savitskiy haqidagi «Orfey iltijosi xaloskori» essesi «Eng ulug', eng aziz» respublika ko'rik-tanlovida g'olib bo'lgan.

Kinodramaturg sifatida «Bog'», «Dil payvandi», «Qaldirg'ochlar yana qaytadi», «Beshovlon» teleseriallarining, «Muzaffar» va «Sarvinoz» badiiy filmlarining adabiy ssenariylarini yozgan, shuningdek, o'nlab hujjatli film va radiopostanovkalarga ssenariy muallifi bo'lgan. Asarlarining bir qismi rus, turk, qoraqalpoq, tojik, nemis va ingliz tillariga tarjima qilingan.

Shoyim Bo'tayev O'zbekiston Yozuvchilar uyushmasining a'zosi. 2002-yilda «Do'stlik» ordeni bilan mukofotlangan; 2023-yil 27-iyundagi Prezident farmoni bilan, Matbuot va ommaviy axborot vositalari xodimlari kuni munosabati bilan, «Mehnat shuhrati» ordeni berilgan.