Шойим Бўтаев

Шойим Бўтаев 1959-йил 20-июнда Тожикистоннинг Ўратепа туманидаги Майдонча қишлоғида туғилган. 1976-йилда ўрта мактабни, 1982-йилда Ленинобод (ҳозирги Хўжанд) давлат педагогика институтининг тарих-филология факултетини тамомлаган.

Меҳнат фаолиятини «Гулистон» журналида бошлаган, кейин «Тонг юлдузи» газетасида бўлим мудири, «Чўлпон» нашриётида муҳаррир бўлиб ишлаган. Ўзбекистон радиосининг «Адабиёт ва радиотеатр» бош таҳририятида ва «Ўзбектелефилм» студиясида бош муҳаррир лавозимларини эгаллаган; Ўзбекистон Республикаси ҳужжатли ва илмий-оммабоп филмлар киностудиясида ҳам узоқ йиллар бош муҳаррир бўлган. Кейинчалик «Чўлпон» номидаги нашриёт-матбаа ижодий уйида бош муҳаррир ўринбосари бўлиб ишлаган.

Адабиётга 1980-йилларнинг ўрталарида кириб келган. Илк қиссаси «Сирли юлдузлар» 1984-йилда «Шарқ юлдузи» журналида босилган, ўша йили «Дунёнинг сарҳисоби бор» қиссалар тўплами чоп этилган. Кейин «Энди бари бошқача» ҳикоялар тўплами (1988) ва «Шамол ўйини» қисса ва ҳикоялар мажмуаси (1995) нашр қилинган.

«Қўрғонланган ой» романи 1996-йилда чиққан. Унинг китоблари қаторида «Кунботардаги боғ», «Ҳаёт», «Кўчада қолган овоз» тўпламлари, «Шоҳ» ва «Еттинчи тонг» романлари бор. Шунингдек, «Шукур Бурҳон», «Одил Ёқубов феномени», «Шукур, айт-чи бу ҳаёт нима?» (Шукур Холмирзаев ҳақида) эсселари ёзган; И. В. Савитский ҳақидаги «Орфей илтижоси халоскори» эссеси «Энг улуғ, энг азиз» республика кўрик-танловида ғолиб бўлган.

Кинодраматург сифатида «Боғ», «Дил пайванди», «Қалдирғочлар яна қайтади», «Бешовлон» телесериалларининг, «Музаффар» ва «Сарвиноз» бадиий филмларининг адабий ссенарийларини ёзган, шунингдек, ўнлаб ҳужжатли филм ва радиопостановкаларга ссенарий муаллифи бўлган. Асарларининг бир қисми рус, турк, қорақалпоқ, тожик, немис ва инглиз тилларига таржима қилинган.

Шойим Бўтаев Ўзбекистон Ёзувчилар уюшмасининг аъзоси. 2002-йилда «Дўстлик» ордени билан мукофотланган; 2023-йил 27-июндаги Президент фармони билан, Матбуот ва оммавий ахборот воситалари ходимлари куни муносабати билан, «Меҳнат шуҳрати» ордени берилган.