Vohid Qodirov

Vohid Qodirov 1925-yil 1-oktabrda Toshkentda tug'ilgan. Urush yillarida Toshkent aviatsiya zavodida ishchi bo'lib ishlagan va zavodning dramatik to'garagida faol ishtirok etgan. Keyinchalik A. N. Ostrovskiy nomidagi Toshkent teatr va rassomlik institutida o'qigan.

1948-yildan 1992-yilda vafotigacha, qariyb yarim asr davomida Toshkent Yosh tomoshabinlar teatrida (hozirgi Yoshlar teatri) ishlagan. Sahnadagi birinchi obrazi — shu yili teatrda qo'yilgan «Po'lat qanday toblandi» spektaklidagi Klimka. Keyingi yillarda Mister Tomas («Oppog'im», V. Lyubimov), Chiranchoq quyoncha (S. Mixalkov), Jurjon hokimi («Oygul bilan Baxtiyor», H. Olimjon), Mansur («Kim aybdor»), Qovoqvoy va Konfetvoy (P. Mo'min asarlari), Sariboy («Shum bola», G'. G'ulom), Ikrom («Mehribonlar», Alp Jamol) kabi rollarni ijro etgan. Dramatik, komik, satirik va ertak janridagi rollar ustasi sifatida tanilgan.

Rejissyor sifatida Yosh tomoshabinlar teatrida E. Rahimovning «Tayyorga ayyor», P. Mo'minning «Suqatoy va Konfetvoy» va Alp Jamolning «Mehribonlar» spektakllarini sahnalashtirgan. Teatr.uz saytidagi tarjimai holiga ko'ra, bolalar va o'smirlar uchun mo'ljallangan deyarli har bir televizion spektaklda ishtirok etgan; «Otalar so'zi — aqlning ko'zi», «Televizion miniatyuralar teatri», «Ekran xandasi», «Shunchaki sarguzasht» ko'rsatuvlarining faol ishtirokchisi bo'lgan.

Kinoda 1958-yildan boshlab «Maftuningman» filmidan to 1991-yildagi «Birinchi bo'sa» qisqametrajli filmigacha yigirmadan ortiq asarda ishtirok etgan. Eng mashhur obrazi — Gafur G'ulomning qissasi asosidagi «Shum bola» (1977, rejissyor Damir Salimov) filmidagi Sariboy: bu rolni teatrda ijro etgani uchun kino ijodkorlari uni filmga ham taklif qilgan. Shuningdek «Osiyo ustida bo'ron», «Chinor tagidagi duel», «Akmal va ajdaho» filmlarida ham o'ynagan. «O'zbekfilm» studiyasida o'zbek tiliga dublyaj qilingan bir qator badiiy filmlarni ovozlashtirgan.

1980-yilda unga O'zbekiston SSR xalq artisti faxriy unvoni berilgan. Vohid Qodirov 1992-yil 8-mayda Toshkentda vafot etgan.