Xurshid Do'stmuhammad

Xurshid Do'stmuhammad (rasmiy hujjatlarda Xurshid Nabiyevich Do'stmuhamedov) 1951-yil 8-yanvarda Toshkentda tug'ilgan. 1969–1973-yillarda Toshkent davlat universitetining (hozirgi O'zbekiston Milliy universiteti) jurnalistika fakultetida o'qigan.

Mehnat faoliyatini 1973-yilda Fanlar akademiyasining «Fan» nashriyotida boshlagan, so'ng «Fan va turmush» jurnalida (1978–1984) va «Qishloq haqiqati» gazetasida (1984–1986) ishlagan. 1986–1995-yillarda «Yosh kuch» jurnalida bo'lim mudiri, bosh muharrir o'rinbosari va bosh muharrir lavozimlarida bo'lgan.

1995–1997-yillarda O'zbekiston ommaviy axborot vositalarini demokratlashtirish va qo'llab-quvvatlash ijtimoiy-siyosiy jamg'armasi hamraisi bo'lgan, 1997–2002-yillarda «Hurriyat» gazetasiga, 2002–2005-yillarda «O'zbekiston matbuoti» jurnaliga bosh muharrirlik qilgan. Keyinchalik Oliy Majlis Qonunchilik palatasida ishlagan, 2020-yilda palata deputati etib saylangan. Filologiya fanlari doktori.

Uning dastlabki hikoyasi 1981-yilda «Guliston» jurnalida, «Nigoh» nomli birinchi qissasi 1987-yilda «Yoshlik» jurnalida e'lon qilingan. Birinchi kitobi «Hovli etagidagi uy» 1989-yilda chiqqan. Keyinchalik «Panoh», «Oromkursi», «So'roq», «Sof o'zbekcha qotillik», «Hijronim mingdir mening» kabi qissa va hikoyalari, 1990-yillarda «Jajman» kitobi, «Bozor» romani nashr etilgan; 2014-yilda «Qichqiriq», 2016-yilda «Donishmand Sizif» romanlari chop etilgan.

Do'stmuhammad yapon yozuvchisi Ryunoske Akutagavaning «Rasyomon darvozasi» hikoyasini va boshqa xorijiy mualliflar asarlarini o'zbek tiliga tarjima qilgan. Uning ssenariysi asosida 2000-yilda «Chayongul» badiiy filmi suratga olingan.

1997-yilda «Shuhrat» medali bilan taqdirlangan. «Bozor» romani, «Hijronim mingdir mening» va «Ozod iztirob quvonchlari» kitoblari uchun 2000-yilda «Ofarin» adabiy mukofotini olgan. 2006-yilda «Do'stlik» ordeni bilan mukofotlangan, 2020-yilda unga «O'zbekiston Respublikasida xizmat ko'rsatgan madaniyat xodimi» faxriy unvoni berilgan.