Аброр Мухтор Алий

Аброр Мухтор Алий (асл исми Аброр Абдуазимов) — ўзбекистонлик имом, дин олими ва диний блогер. Википедия маълумотига кўра, 1976-йил 22-июлда Наманган вилояти Чуст туманидаги Каркидон қишлоғида туғилган.

Наманганда ва Тошкентда мадрасаларда ўқиган, 2004-йилда Тошкент ислом институтини тамомлаган, 2009–2011-йилларда Ўзбекистон Миллий университетида журналистика йўналишида магистратурада таҳсил олган.

2004–2008-йилларда Тошкент вилоятидаги «Олимжон ота» жоме масжидида имом-хатиб, 2008–2009-йилларда Хоразмдаги «Фахриддин ар-Розий» диний таълим муассасасида ўқитувчи, 2011–2022-йилларда Тошкент ислом университети ўқитувчиси бўлган. 2020-йилда Ўзбекистон ислом сивилизацияси маркази жамоатчилик билан ишлаш бўлими бош илмий ходими бўлди, 2021-йилда Ўзбекистон мусулмонлари идораси Қуръон ва тажвид ўргатиш бўлими мудири ўринбосари этиб тайинланди.

Изуддин Байюнийнинг «Таҳорат ва намоз ҳукмлари» ҳамда Абдулваҳҳоб Машҳодийнинг «Намозимиз далиллари» китобларини ўзбек тилига таржима қилган. Ижтимоий тармоқларда кенг аудиторияга эга диний блогер сифатида танилган.