Энмарк Салихов

Энмарк Шакирович Салихов 1934-йил 12-сентабрда Тошкентда туғилган. 1963-йилда Тошкент консерваториясини Б. И. Зейдман композиция синфида тамомлаган. Ўзбекистондаги ижодий фаолиятини 1950-йилларда консерватория талабаси бўлган пайтида бошлаган.

1960–1970-йилларда бир неча жамоага раҳбарлик қилган: Ўзбекистон ССР Телерадиокомитети эстрада-симфоник оркестрининг бадиий раҳбари бўлган, «Ўзбекконцерт» ва «Ўздавестрада»да ишлаган. 1964-йилда ташкил этилган Ўзбекистон миллий эстрада-симфоник оркестрининг биринчи бадиий раҳбари ва дирижёри ҳамда консерватория эстрада-жаз факултетидаги кафедранинг биринчи мудири бўлган.

1971-йилдан Ўзбекистон ССР Бастакорлар уюшмасининг масъул котиби, 1975–1981-йилларда эса раиси бўлган. 1981-йилдан Ўзбекистон ССР Маданият вазирлигининг мусиқа театрлари бошқармасига раҳбарлик қилган. 1984-йилда Ўзбекистон ССР санъат арбоби унвонига сазовор бўлган.

Қўшиқларидан «Ҳайкал ҳақида баллада» (Ало Хўжаев шеъри), «Тошкент ҳақида қўшиқ» ва «Қиз бола» маълум; охиргиси «Ялла» ВИАси репертуаридаги дастлабки қўшиқлардан бири бўлган. «Прозрение» (1965), «Весенняя мелодия» (1978), «Золотое руно» (1981), «Шакалй» (1989) ва бошқа филмларга мусиқа ёзган. 2005-йилда оиласи билан Россияга кўчган ва 2022-йилда вафот этган.