Галина Мелникова

Галина Виталевна Мелникова 1936-йил 23-декабрда Тошкентда туғилган. 1961-йилда чет тиллар педагогика институтини тамомлаган.

Телевидениедаги фаолиятини 1956-йилнинг 26-декабрида, йигирма ёшида, республика телерадиокомпаниясининг жонли эфирида чиқиш билан бошлаган. Ярим асрдан ортиқ вақт давомида компания штатида ишлаган ва олий тоифали диктор сифатида тан олинган.

Кўп йиллар мобайнида «Ахборот» янгиликлар дастурини (ҳозирги «Ўзбекистон 24») олиб борган, шунингдек, байрам ва тантанали тадбирлар, репортажлар ҳамда ҳукумат концертларининг бошловчиси бўлган. Мустақиллик йилларида Президентнинг байрам табриклари ва расмий мурожаатларини эфирда ўқиб эшиттирган.

Сухандон сифатида Москвада ҳам ўзбек санъаткорлари иштирокидаги концертларни Кремл қурултойлар саройида ва Юлдузли шаҳарчада олиб борган. Москвадаги телевидениеда ишлашга қайта-қайта таклиф қилинган бўлса-да, Тошкентда қолган. Эфирда Майя Плисетская, Эдита Пеха, Галина Вишневская каби машҳур санъаткорлар билан суҳбатлашган.

1990-йилдан «Меҳржон» хайрия жамғармаси ҳомийлик кенгаши аъзоси; етим болалар ва мактаб-интернат тарбияланувчилари учун болалар ижоди марафонлари ўтказади. Хайрия фаолияти учун унга Мира архиепископи Авлиё Николай ордени медали берилган; мукофотни Тошкент ва Марказий Осиё митрополити топширган.

1975-йилда унга Ўзбекистон ССР хизмат кўрсатган артисти унвони берилган. Кейинчалик 1993-йилда Ўзбекистон Республикаси Фахрий ёрлиғи, 1998-йилда «Дўстлик» ордени билан тақдирланган; шунингдек, «Фидокорона хизматлари учун» ордени, Россиянинг Пушкин медали ва «Олтин қалам» миллий мукофоти соҳиби. 2016-йил 23-декабрда, 80 ёшга тўлган куни, Президент фармони билан «Ўзбекистон халқ артисти» фахрий унвони берилган. 2017-йилда Россия Президенти фармони билан Россиянинг «Дўстлик» ордени билан мукофотланган.

2020-йилда санъатшунос Инесса Гулзарова унинг ҳаёти ва фаолиятига бағишланган «Галина Мелникова. Даврнинг тирик рамзи» китобини нашр этган; китоб тақдимоти Алишер Навоий номидаги Ўзбекистон Миллий кутубхонасида ўтган.