Кавсар Турдиева

Кавсар Турдиева 1958-йил 6-августда Тошкентда туғилган. 1975-йилда Чилонзор туманидаги 201-мактабни олтин медал билан тугатиб, Тошкент давлат университетининг (ҳозирги Ўзбекистон Миллий университети) журналистика факултетига кирган, сўнг ўқишини Ленинград давлат университетида давом эттириб, 1981-йилда журналист ихтисослигини олган. Кейинроқ Ўзбекистон Фанлар академиясининг Алишер Навоий номидаги Тил ва адабиёт институти аспирантурасида ўқиган; 1994-йилда замонавий ўзбек болалар шеъриятидаги маънавият муаммоларига бағишланган номзодлик диссертациясини ҳимоя қилиб, филология фанлари номзоди бўлган.

Илк шеъри мактаб йилларида «Тонг юлдузи» газетасида босилган. Биринчи китоби — «Варрак» 1983-йилда нашр этилган. Кейин «Ўйнаяпман, ўйлаяпман» (1987), «Қуш бўлиб учган она» (1994), «Рақамлар бўйлаб саёҳат» (2002) китоблари, «Боту нидоси» (2004), «Митти қўғирчоқбоз» (2007), «Қувноқ алифбо оламига саёҳат» (2008), «Соғинчлар сочилган бекатда» (2011), «Дунёни сақланг, болалар» (2012) каби шеърий тўпламлари чиққан. У Ўзбекистон Ёзувчилар уюшмаси аъзоси.

Касбий фаолиятини Тошкент педиатрия тиббиёт институтида ўқитувчи сифатида бошлаган; 1997-йил 2-сентабрдан шу институтда ўзбек тили кафедрасини бошқаради (2019-йилдаги фармонда кафедра ўзбек, рус ва лотин тиллари кафедраси деб аталади). Тиббиёт олий ўқув юртининг рус тилида ўқийдиган талабалари учун «Ўзбек тили» дарслигини (2006–2007) ва рус тили бўйича «30 шагов к русскому язйку» (2010) қўлланмасини ёзган.

Шоира болалар драматургияси билан ҳам шуғулланган: унинг «Тошкесаклар мамлакатида» номли саҳна асари Самарқанд қўғирчоқ театрида саҳналаштирилган. «Зумраша» ҳажвий киножурнали (1997–2001) учун кўплаб ссенарийлар ёзган. Икки юздан ортиқ қўшиқ матни муаллифи; Корней Чуковский, Самуил Маршак, Лев Барбас, Рустам Фарҳодий асарларини ўзбек тилига таржима қилган.

2001-йилда адабий ва ижтимоий фаолияти учун «Шуҳрат» медали билан тақдирланган. 2009-йилда «Энг улуғ, энг азиз» танловининг адабиёт йўналиши ғолиби бўлган, 2010-йилда «Болаларнинг севимли шоираси» номинациясини қўлга киритган. 2019-йил 28-августдаги Президент фармони билан унга «Ўзбекистон Республикасида хизмат кўрсатган ёшлар мураббийси» фахрий унвони берилган.