Николай Илин

Николай Дмитриевич Илин 1950-йил 27-ноябрда Россиянинг Челябинск вилоятидаги Златоуст шаҳрида туғилган. Оиласи Тошкентга кўчиб келган; у шу ерда ўрта мактабни тамомлаб, Тошкент давлат университетининг филология факултетида ўқиган.

Илин касби бўйича филолог ва ўқитувчи. 1975–1997-йилларда Тошкентдаги Республика рус тили ва адабиёти педагогика институтида ҳамда Ўзбекистон давлат жаҳон тиллари университетида рус адабиётидан дарс берган. Педагогика фанлари номзоди, доцент; адабиёт тарихи ва назарияси, таълим услубиётига оид 60 дан ортиқ илмий ишнинг муаллифи. У «Преподавание язйка и литературй» илмий-услубий журналида бўлим муҳаррири бўлган, шунингдек рус тилидаги «Звезда Востока» журнали бош муҳаррирининг ўринбосари сифатида иш олиб борган.

Илиннинг шеърлари «Под знаком осени» ва «Малйй шёлковйй пут» (Тошкент), «Кронос» (Даугавпилс, Латвия), «I помнит мир спасённйй…» (Москва) алманахларида, Москвадаги «Друзҳба народов» журналида чоп этилган. Унинг шеърий тўпламлари 2004-йилдан бери нашр этилади: «Первая тетрад» (2004), «По клавишам души» (2005), «На кочевякҳ времён» (2006), «Обетованная памят» (2008), «По стопам листопада» (2010), «Листва и корни» (2015), «Эсли окно открйто…» (2017), «Архивариус осени» (2020).

Ижодида ўзбек адабиётини русчага ўгириш ва уни ўрганиш алоҳида ўрин тутади. Илин Навоий, Бобур, Паҳлавон Маҳмуд, Абдулла Орипов, Эркин Воҳидов, Сирожиддин Саййид, Чўлпон, Миртемир, Гўзалбегим, Хосият Рустамова ва бошқа шоирларнинг шеърларини рус тилига таржима қилган. 2020-йилда у Абдулҳамид Чўлпоннинг «Мгновения любви» («Севги лаҳзалари») тўпламини тузиб, таржима қилган. 2022-йилда Ўзбекистон Ёзувчилар уюшмаси «Адабиёт» нашриётида унинг ўзбек ва Ўзбекистондаги рус адабиётлари, таржима назариясига бағишланган «Пересекаюшчиеся параллелли» китобини чиқарган.

2011-йилда Илин Ўзбекистон Мустақиллигининг 20 йиллигига бағишланган «Ватан учун яшайлик» адабий танловининг ғолиби бўлган. У Ўзбекистон Ёзувчилар уюшмасининг аъзоси ва «Дўстлик» ордени соҳиби.