Улуғбек Ҳамдам

Улуғбек Ҳамдам (тўлиқ исми Улуғбек Абдуваҳобович Ҳамдамов) 1968-йил 24-апрелда Андижон вилоятининг Марҳамат туманидаги Юқори Роввот маҳалласида туғилган. 1985-йилда мактабни тугатган, 1986–1988-йилларда ҳарбий хизматда бўлган, Тошкент давлат университетида филология бўйича таҳсил олган (1988–1993).

1992-йилда давлат таълим тақсимоти бўйича ўқишни давом эттириш учун Туркиянинг Коня шаҳрига юборилган. 1993–1994-йилларда Шарқшунослик институтида ўқитувчи бўлган, 1994–1996-йилларда Ўзбекистон Миллий университети ўзбек филологияси факултетининг аспирантурасида ўқиган. 1997-йилда «XX асрнинг 30-йиллари шеъриятида ўзбекча соф лирика «муаммолари»» мавзусида номзодлик диссертациясини ҳимоя қилган.

1997–2009-йилларда Ўзбекистон Фанлар академиясининг Алишер Навоий номидаги Тил ва адабиёт институтида кичик, сўнг катта илмий ходим бўлиб ишлаган; 2003-йилдан Ўзбекистон Ёзувчилар уюшмаси аъзоси. 2009–2015-йилларда «Шарқ юлдузи» журналининг бош муҳаррири бўлган.

Адабиётга қисса ва ҳикоялар тўплами «Ёлғизлик» (1998) билан кирган; ундан кейин «Мувозанат», «Исён ва итоат» (2004), «Сабо ва Самандар» романлари, «Тангрига элтувчи исён», «Атиргул», «Сени кутдим» шеърий тўпламлари, «Узоқдаги Дилнура» (2010) ва «Ота» (2019) китоблари чоп этилган. Адабиётшунослик соҳасида «Бадиий тафаккур тадрижи» ва «Янгиланиш эҳтиёжи» каби китоблар ёзган. «Ёлғизлик» 2018-йилда Қозонда татар тилига таржима қилиб нашр этилган.

У туркий тиллардан, жумладан турк тилидан ўзбекчага таржима қилади: Жалолиддин Румийнинг «Ичиндаги ичиндадир» асарини (1997, 2001) ва Усмон Туроннинг «Туркий халқлар мафкураси» китобини (1995) ўзбек тилига ўгирган.

2016-йилдан Алишер Навоий номидаги Тошкент давлат ўзбек тили ва адабиёти университетида жаҳон адабиёти кафедрасини бошқарган, 2021-йилдан Ўзбекистон Фанлар академияси Тил ва адабиёт институтида XX аср ўзбек адабиёти ва ҳозирги адабий жараён бўлими мудири. 2004-йилда «Шуҳрат» медали билан тақдирланган.