Abbos Atoyev

Abbos Abdurazzoqovich Atoyev 1986-yil 7-iyunda Buxoro viloyati Vobkent tumanidagi Qulxatib qishlog'ida tug'ilgan, chap qo'l bokschi. 2004–2008-yillarda Buxoro davlat universitetida o'qigan; 2004–2009-yillarda Buxoro viloyatidagi olimpiya zaxiralari sport maktabida boks bo'yicha murabbiy bo'lib ishlagan, 2009-yildan Markaziy harbiy sport klubining harbiy xizmatchisi.

2004-yilda o'smirlar o'rtasida jahon chempionatida bronza, talabalar o'rtasida jahon chempionatida kumush medal olgan. 2007-yilda Osiyo chempionatida (finalda Chjan Syaopinni yengib) va Chikagodagi jahon chempionatida 81 kg vazn toifasida g'olib bo'lgan: yarim finalda Yerkebulan Shinaliyevni, finalda Artur Beterbiyevni mag'lub etgan. 2008-yilgi Pekin Olimpiadasida birinchi bellashuvda Jahon Qurbonovga yutqazgan. 2009-yilda Milanda bo'lgan jahon chempionatida 75 kg vazn toifasida ikkinchi marta jahon chempioni bo'lgan (finalda Andranik Akopyanni yengib).

2010-yilgi Guanchjou Osiyo o'yinlarida finalda Vijender Singxga yutqazib, kumush medal olgan. 2011-yilgi Boku jahon chempionatida birinchi bellashuvda Ryota Muratadan yutqazgan. 2012-yilda Osiyo saralash turnirida g'olib bo'lib, London Olimpiadasiga yo'llanma oldi: Badreddin Haddioui (11:9), Bogdan Juratoni (12:10) va Vijender Singxni (17:13) mag'lub etdi, yarim finalda Ryota Muratoga 12:13 hisobida yutqazib, bronza medalni qo'lga kiritdi.

Mukofotlari: 2005-yil «O'zbekiston belgisi» ko'krak nishoni, 2007-yil «El-yurt hurmati» ordeni, 2009-yil «O'zbekiston iftixori» faxriy unvoni, 2012-yil «O'zbekiston Respublikasida xizmat ko'rsatgan sportchi» unvoni; xalqaro toifadagi sport ustasi.