Аббос Атоев

Аббос Абдураззоқович Атоев 1986-йил 7-июнда Бухоро вилояти Вобкент туманидаги Қулхатиб қишлоғида туғилган, чап қўл боксчи. 2004–2008-йилларда Бухоро давлат университетида ўқиган; 2004–2009-йилларда Бухоро вилоятидаги олимпия захиралари спорт мактабида бокс бўйича мураббий бўлиб ишлаган, 2009-йилдан Марказий ҳарбий спорт клубининг ҳарбий хизматчиси.

2004-йилда ўсмирлар ўртасида жаҳон чемпионатида бронза, талабалар ўртасида жаҳон чемпионатида кумуш медал олган. 2007-йилда Осиё чемпионатида (финалда Чжан Сяопинни енгиб) ва Чикагодаги жаҳон чемпионатида 81 кг вазн тоифасида ғолиб бўлган: ярим финалда Еркебулан Шиналиевни, финалда Артур Бетербиевни мағлуб этган. 2008-йилги Пекин Олимпиадасида биринчи беллашувда Жаҳон Қурбоновга ютқазган. 2009-йилда Миланда бўлган жаҳон чемпионатида 75 кг вазн тоифасида иккинчи марта жаҳон чемпиони бўлган (финалда Андраник Акопянни енгиб).

2010-йилги Гуанчжоу Осиё ўйинларида финалда Вижендер Сингхга ютқазиб, кумуш медал олган. 2011-йилги Боку жаҳон чемпионатида биринчи беллашувда Рёта Муратадан ютқазган. 2012-йилда Осиё саралаш турнирида ғолиб бўлиб, Лондон Олимпиадасига йўлланма олди: Бадреддин Ҳаддиоуи (11:9), Богдан Журатони (12:10) ва Вижендер Сингхни (17:13) мағлуб этди, ярим финалда Рёта Муратога 12:13 ҳисобида ютқазиб, бронза медални қўлга киритди.

Мукофотлари: 2005-йил «Ўзбекистон белгиси» кўкрак нишони, 2007-йил «Эл-юрт ҳурмати» ордени, 2009-йил «Ўзбекистон ифтихори» фахрий унвони, 2012-йил «Ўзбекистон Республикасида хизмат кўрсатган спортчи» унвони; халқаро тоифадаги спорт устаси.