Akbar Haydarov

Akbar Haydarov (Akbarqori hofiz) 1893-yil 5-yanvarda Marg'ilonda tug'ilgan. Xonandalik va dutor chertishni otasi Haydar hofizdan o'rgangan, qorixonada qiroatni o'zlashtirgan, keyin katta ashula yo'llarini va tanbur chalishni o'rgangan.

Toshkentda yashab, boshqa hofizlar bilan birga «Sharqiya» kechalari va turli konsertlarda qatnashgan. 1927-yildan O'zbekiston radioqo'mitasida ashulachi va sozanda bo'lgan. Moskvada o'tkazilgan o'zbek san'ati dekadasida qatnashgan, Katta Farg'ona kanali, Farhod GES va boshqa qurilishlarda ishlaganlarga, Ikkinchi jahon urushi davrida jangchilarga madaniy xizmat ko'rsatgan. 1930-yillarda Qayum Shobaratov bilan Toshkent O'rdasida «Nafosat» choyxonasini tashkil qilgan.

Baland, nafis va tiniq tenor ovoz sohibi bo'lgan. Repertuarida katta ashulalar («Bir kelib ketsun», «Yovvoyi Ushshoq», «Adashganman»), ashulalar va Farg'ona–Toshkent maqom yo'llari («Bayot», «Ushshoq») bor; «Munojot», «Cho'li Iroq» ashula yo'llarini yaratgan. 1939-yilda unga O'zbekiston xalq hofizi unvoni berilgan. 1964-yil 13-fevralda Toshkentda vafot etgan.

Repertuarida yana «Ey, chehrasi tobonim», «Suvora», «Girya», «Farg'onacha Shahnoz» kabi ashulalar bor. U uzoq yillar Turg'un Karimov bilan birga ijro etgan. Uning gramofon yozuvlari 1930–1950-yillarda qilingan, katta ashulalarining ba'zilarini V. Uspenskiy 1940-yillarda notaga olgan.