Акбар Ҳайдаров

Акбар Ҳайдаров (Акбарқори ҳофиз) 1893-йил 5-январда Марғилонда туғилган. Хонандалик ва дутор чертишни отаси Ҳайдар ҳофиздан ўрганган, қорихонада қироатни ўзлаштирган, кейин катта ашула йўлларини ва танбур чалишни ўрганган.

Тошкентда яшаб, бошқа ҳофизлар билан бирга «Шарқия» кечалари ва турли концертларда қатнашган. 1927-йилдан Ўзбекистон радиоқўмитасида ашулачи ва созанда бўлган. Москвада ўтказилган ўзбек санъати декадасида қатнашган, Катта Фарғона канали, Фарҳод ГЕС ва бошқа қурилишларда ишлаганларга, Иккинчи жаҳон уруши даврида жангчиларга маданий хизмат кўрсатган. 1930-йилларда Қаюм Шобаратов билан Тошкент Ўрдасида «Нафосат» чойхонасини ташкил қилган.

Баланд, нафис ва тиниқ тенор овоз соҳиби бўлган. Репертуарида катта ашулалар («Бир келиб кетсун», «Ёввойи Ушшоқ», «Адашганман»), ашулалар ва Фарғона–Тошкент мақом йўллари («Баёт», «Ушшоқ») бор; «Муножот», «Чўли Ироқ» ашула йўлларини яратган. 1939-йилда унга Ўзбекистон халқ ҳофизи унвони берилган. 1964-йил 13-февралда Тошкентда вафот этган.

Репертуарида яна «Эй, чеҳраси тобоним», «Сувора», «Гиря», «Фарғонача Шаҳноз» каби ашулалар бор. У узоқ йиллар Турғун Каримов билан бирга ижро этган. Унинг грамофон ёзувлари 1930–1950-йилларда қилинган, катта ашулаларининг баъзиларини В. Успенский 1940-йилларда нотага олган.