Doni Zokirov

Doni Zokirov 1914-yil 26-dekabrda Samarqandda tug'ilgan. U bastakor, g'ijjakchi sozanda va dirijyor bo'lgan. 1930-yilda Samarqand viloyat musiqali drama teatri xalq cholg'ulari orkestrida g'ijjakchi sifatida ish boshlagan, 1933-yilda shu orkestrning musiqa rahbari bo'lgan.

1936–1937-yillarda O'zbek davlat musiqali teatrida sozanda, 1937–1940-yillarda O'zbekiston davlat filarmoniyasi xalq cholg'ulari orkestrining bosh sozandasi bo'lgan; 1940–1947-yillarda Muqimiy teatrida ishlagan. 1948–1953-yillarda televideniye va radio xalq cholg'ulari orkestrining dirijyori, 1953–1957-yillarda filarmoniya qo'shiq va raqs ansamblining badiiy rahbari bo'lgan. 1953-yilda Toshkent konservatoriyasining B. Nadejdin sinfida kompozitsiya bo'yicha o'qishni tugatgan.

1957-yildan teleradio orkestrining bosh dirijyori, 1960-yildan badiiy rahbari bo'lgan; 1989-yilda orkestr uning nomi bilan atalgan. «Oynisa» baleti (1957, B. Giyenko bilan), «Zaynab va Omon» operasi (1958), «Dalada bayram» musiqali komediyasi (1954) hamda «Yoshlikda bergan ko'ngil» va «Mening jannatim» musiqali dramalarini yaratishda qatnashgan. «Davrim sadosi» kantatasi (1970), «Qarshi cho'li gullari» vokal-simfonik syuitasi (1972), «Ona diyor», «Ko'chalar», «Samarqandim» kabi qo'shiqlari bor, xalq kuylari va klassik asarlarni xalq cholg'ulari orkestri uchun qayta ishlagan.

Kino uchun Mixail Ziv bilan hamkorlikda «Amirlikning qulashi» (1955), «Qutlug' qon» (1956) va «Ulug'bek yulduzi» (1965) filmlariga musiqa yozgan. 1969-yilda O'zbekiston xalq artisti unvoniga sazovor bo'lgan. U 1985-yil 26-noyabrda Toshkentda vafot etgan.