Дони Зокиров

Дони Зокиров 1914-йил 26-декабрда Самарқандда туғилган. У бастакор, ғижжакчи созанда ва дирижёр бўлган. 1930-йилда Самарқанд вилоят мусиқали драма театри халқ чолғулари оркестрида ғижжакчи сифатида иш бошлаган, 1933-йилда шу оркестрнинг мусиқа раҳбари бўлган.

1936–1937-йилларда Ўзбек давлат мусиқали театрида созанда, 1937–1940-йилларда Ўзбекистон давлат филармонияси халқ чолғулари оркестрининг бош созандаси бўлган; 1940–1947-йилларда Муқимий театрида ишлаган. 1948–1953-йилларда телевидение ва радио халқ чолғулари оркестрининг дирижёри, 1953–1957-йилларда филармония қўшиқ ва рақс ансамблининг бадиий раҳбари бўлган. 1953-йилда Тошкент консерваториясининг Б. Надеждин синфида композиция бўйича ўқишни тугатган.

1957-йилдан телерадио оркестрининг бош дирижёри, 1960-йилдан бадиий раҳбари бўлган; 1989-йилда оркестр унинг номи билан аталган. «Ойниса» балети (1957, Б. Гиенко билан), «Зайнаб ва Омон» операси (1958), «Далада байрам» мусиқали комедияси (1954) ҳамда «Ёшликда берган кўнгил» ва «Менинг жаннатим» мусиқали драмаларини яратишда қатнашган. «Даврим садоси» кантатаси (1970), «Қарши чўли гуллари» вокал-симфоник сюитаси (1972), «Она диёр», «Кўчалар», «Самарқандим» каби қўшиқлари бор, халқ куйлари ва классик асарларни халқ чолғулари оркестри учун қайта ишлаган.

Кино учун Михаил Зив билан ҳамкорликда «Амирликнинг қулаши» (1955), «Қутлуғ қон» (1956) ва «Улуғбек юлдузи» (1965) филмларига мусиқа ёзган. 1969-йилда Ўзбекистон халқ артисти унвонига сазовор бўлган. У 1985-йил 26-ноябрда Тошкентда вафот этган.