Erkin Usmonov

Erkin Usmonov — o'zbek nosiri, tarjimon va jurnalist. U 1952-yil 10-fevralda Toshkentda tug'ilgan.

Adabiyotga yoshligida kirib kelgan: «Lenin uchquni» (hozirgi «Tong yulduzi») gazetasi qoshidagi «Yosh adabiyotchilar» to'garagida ilk saboq olgan. 1967-yilda shu gazetada uning «K. K.» nomli birinchi fantastik hikoyasi bosilgan, hikoya o'sha yilgi yosh ijodkorlarning «To'yona» tanlovida ikkinchi sovrinni olgan.

Maktabni bitirgach, Toshkent davlat chet tillar institutida o'qigan va 1978-yilda uni tamomlagan. Turli yillarda qurilishda, yoshlar teatrida, «O'zbektelefilm» studiyasida ishlagan; harbiy xizmatni «Mosfilm» qoshidagi otliq kino polkida o'tagan. Qariyb yigirma yil O'zbekiston radiosining adabiy-dramatik eshittirishlar bosh tahririyatida turli lavozimlarda xizmat qilgan.

Muallifning hikoya va qissalari bir necha kitob bo'lib chop etilgan: «Gunafsha» (1981), «O'g'ildan sovg'a keldi» (1984), «Olam nurga to'ladi» (1987), «Dilingda darding bo'lsa», «Yostiqdek kitobdan uch sahifa» (1989), «Hayratlarga to'la dunyo» (1995), «Qatortol tomonlarda» (2007). 2008-yilda «Ajal xiyoboni» nomli saylanmasi nashr qilingan.

U tarjima bilan ham shug'ullangan: Karel Chapek, Grin, Paustovskiy va Anor asarlarini rus hamda ingliz tillaridan o'zbekchaga o'girgan. «Onaginam», «Yuk ko'targan odam», «Gulliverlar», «Ayol kishining baxti» kabi qissa va hikoyalari asosida televideniye va radio uchun spektakllar yaratilgan.

Erkin Usmonov O'zbekiston Yozuvchilar uyushmasi va O'zbekiston Jurnalistlar uyushmasining a'zosi bo'lgan. U 2016-yil 4-dekabrda Toshkentda vafot etgan.