Эркин Усмонов

Эркин Усмонов — ўзбек носири, таржимон ва журналист. У 1952-йил 10-февралда Тошкентда туғилган.

Адабиётга ёшлигида кириб келган: «Ленин учқуни» (ҳозирги «Тонг юлдузи») газетаси қошидаги «Ёш адабиётчилар» тўгарагида илк сабоқ олган. 1967-йилда шу газетада унинг «К. К.» номли биринчи фантастик ҳикояси босилган, ҳикоя ўша йилги ёш ижодкорларнинг «Тўёна» танловида иккинчи совринни олган.

Мактабни битиргач, Тошкент давлат чет тиллар институтида ўқиган ва 1978-йилда уни тамомлаган. Турли йилларда қурилишда, ёшлар театрида, «Ўзбектелефилм» студиясида ишлаган; ҳарбий хизматни «Мосфилм» қошидаги отлиқ кино полкида ўтаган. Қарийб йигирма йил Ўзбекистон радиосининг адабий-драматик эшиттиришлар бош таҳририятида турли лавозимларда хизмат қилган.

Муаллифнинг ҳикоя ва қиссалари бир неча китоб бўлиб чоп этилган: «Гунафша» (1981), «Ўғилдан совға келди» (1984), «Олам нурга тўлади» (1987), «Дилингда дардинг бўлса», «Ёстиқдек китобдан уч саҳифа» (1989), «Ҳайратларга тўла дунё» (1995), «Қатортол томонларда» (2007). 2008-йилда «Ажал хиёбони» номли сайланмаси нашр қилинган.

У таржима билан ҳам шуғулланган: Карел Чапек, Грин, Паустовский ва Анор асарларини рус ҳамда инглиз тилларидан ўзбекчага ўгирган. «Онагинам», «Юк кўтарган одам», «Гулливерлар», «Аёл кишининг бахти» каби қисса ва ҳикоялари асосида телевидение ва радио учун спектакллар яратилган.

Эркин Усмонов Ўзбекистон Ёзувчилар уюшмаси ва Ўзбекистон Журналистлар уюшмасининг аъзоси бўлган. У 2016-йил 4-декабрда Тошкентда вафот этган.