Isajon Sulton

Isajon Sulton (to'liq ismi Sultonov Isajon Abduraimovich) 1967-yil 6-aprelda Farg'ona viloyatining Rishton tumanidagi Avazboy qishlog'ida tug'ilgan. 1985-yilda Toshkent davlat universitetining (hozirgi O'zbekiston Milliy universiteti) jurnalistika fakultetiga o'qishga kirib, uni 1990-yilda tamomlagan.

Adabiyotga o'sha 1990-yilda «Cho'lpon» nashriyotida chiqqan «Munojot» qissasi bilan kirib kelgan. Besh yildan so'ng G'afur G'ulom nomidagi nashriyotda roman va hikoyalardan iborat «Oydinbuloq» kitobi bosilgan. Keyinchalik O'zbekiston Yozuvchilar uyushmasi a'zosi bo'lgan.

Hikoyalari «Sharq yulduzi» jurnalida, shuningdek chet eldagi nashrlarda — Rossiyadagi «Xalqlar do'stligi», Moldovadagi «Russkoye pole», AQShdagi «Lexikon», Turkiyadagi «Kurgan Edebiyat» jurnallarida chop etilgan. «Oydinbuloq» va «Suvdagi kosa» hikoyalari «XX asr o'zbek nasri antologiyasi»ga kiritilgan.

«Boqiy darbadar» romani 2010-yilda «Sharq yulduzi» jurnalida, 2011-yilda alohida kitob bo'lib chiqqan; 2019-yilda uni Kristofer Jeyms Fort ingliz tiliga tarjima qilib, AQShning Mazda Publishers nashriyotida «The Eternal Wanderer» nomi bilan chop etgan. «Ozod» romani 2012-yilda Yozuvchilar uyushmasi mukofotiga sazovor bo'lgan. «Bog'i Eram» to'plami (2015) uchun Turkiyaning «Güncel Sanat» jurnali tanlovida mukofot olgan.

2014-yilda Prezident farmoni bilan unga O'zbekiston Respublikasida xizmat ko'rsatgan madaniyat xodimi unvoni berilgan. So'nggi yillarda tarixiy mavzuga murojaat qilgan: «Hazrati Hizr izidan» (2018), «Bilga xoqon» (jurnalda 2019-yilda, kitob bo'lib 2022-yilda) va «Alisher Navoiy» (2021) romanlari yozilgan. «Alisher Navoiy» 2021-yilda «Yilning eng yaxshi asari» tanlovida birinchi o'rinni olgan.

2021-yil 24-avgustda, mustaqillikning o'ttiz yilligi munosabati bilan, Prezident farmoni bilan unga O'zbekiston xalq yozuvchisi unvoni berilgan. 2022-yil 29-sentabrda Turkiyaning Bursa shahrida «Turkiy dunyo adabiyoti mukofoti»ni (roman yo'nalishida) olgan. Toshkentda yashab ijod qiladi.