Исажон Султон

Исажон Султон (тўлиқ исми Султонов Исажон Абдураимович) 1967-йил 6-апрелда Фарғона вилоятининг Риштон туманидаги Авазбой қишлоғида туғилган. 1985-йилда Тошкент давлат университетининг (ҳозирги Ўзбекистон Миллий университети) журналистика факултетига ўқишга кириб, уни 1990-йилда тамомлаган.

Адабиётга ўша 1990-йилда «Чўлпон» нашриётида чиққан «Муножот» қиссаси билан кириб келган. Беш йилдан сўнг Ғафур Ғулом номидаги нашриётда роман ва ҳикоялардан иборат «Ойдинбулоқ» китоби босилган. Кейинчалик Ўзбекистон Ёзувчилар уюшмаси аъзоси бўлган.

Ҳикоялари «Шарқ юлдузи» журналида, шунингдек чет элдаги нашрларда — Россиядаги «Халқлар дўстлиги», Молдовадаги «Русское поле», АҚШдаги «Лехикон», Туркиядаги «Курган Эдебият» журналларида чоп этилган. «Ойдинбулоқ» ва «Сувдаги коса» ҳикоялари «XX аср ўзбек насри антологияси»га киритилган.

«Боқий дарбадар» романи 2010-йилда «Шарқ юлдузи» журналида, 2011-йилда алоҳида китоб бўлиб чиққан; 2019-йилда уни Кристофер Жеймс Форт инглиз тилига таржима қилиб, АҚШнинг Мазда Публишерс нашриётида «Тҳе Этернал Wanderer» номи билан чоп этган. «Озод» романи 2012-йилда Ёзувчилар уюшмаси мукофотига сазовор бўлган. «Боғи Эрам» тўплами (2015) учун Туркиянинг «Güncel Санат» журнали танловида мукофот олган.

2014-йилда Президент фармони билан унга Ўзбекистон Республикасида хизмат кўрсатган маданият ходими унвони берилган. Сўнгги йилларда тарихий мавзуга мурожаат қилган: «Ҳазрати Ҳизр изидан» (2018), «Билга хоқон» (журналда 2019-йилда, китоб бўлиб 2022-йилда) ва «Алишер Навоий» (2021) романлари ёзилган. «Алишер Навоий» 2021-йилда «Йилнинг энг яхши асари» танловида биринчи ўринни олган.

2021-йил 24-августда, мустақилликнинг ўттиз йиллиги муносабати билан, Президент фармони билан унга Ўзбекистон халқ ёзувчиси унвони берилган. 2022-йил 29-сентабрда Туркиянинг Бурса шаҳрида «Туркий дунё адабиёти мукофоти»ни (роман йўналишида) олган. Тошкентда яшаб ижод қилади.