Jalolitdin Muxitdinov

Jalolitdin Paxritdinovich Muxitdinov — kimyoviy-texnologik jarayonlarni avtomatlashtirish va modellashtirish sohasidagi olim, texnika fanlari doktori, Toshkent davlat texnika universiteti «Ishlab chiqarish jarayonlarini avtomatlashtirish» kafedrasi professori. 1948-yil 13-aprelda Toshkentda tug'ilgan.

1955—1966-yillarda Toshkentdagi 65-maktabda o'qigan. 1966-yilda Toshkent politexnika institutining kimyo texnologiyasi fakultetiga kirib, 1971-yilda «Kimyoviy-texnologik jarayonlarni avtomatlashtirish va kompleks mexanizatsiyalashtirish» mutaxassisligi bo'yicha muhandis-texnolog diplomini olgan. Institutdan so'ng yo'llanma bilan O'zbekiston SSR Fanlar akademiyasining Kibernetika institutiga ishga yuborilgan.

1975-yilda Moskva kimyo-texnologiya institutining aspiranturasiga kirgan va 1978-yilda nomzodlik dissertatsiyasini himoya qilgan. 1979—1987-yillarda Toshkent politexnika institutida assistent, so'ngra «Texnikaviy kibernetika» kafedrasi mudiri bo'lgan. 1987-yildan 1991-yilgacha Sohalararo malaka oshirish institutida kafedra mudiri va ilmiy ishlar bo'yicha direktor o'rinbosari lavozimlarida ishlagan.

1992—1995-yillarda Toshkent davlat texnika universitetida dotsent va o'quv bo'limi boshlig'i bo'lgan. 1995—2000-yillarda «Biokimyo» aksiyadorlik jamiyatiga avval direktor, keyin kengash raisi sifatida rahbarlik qilgan. 2001-yildan 2004-yil noyabrigacha Toshkent kimyo-texnologiya institutida o'quv bo'limi boshlig'i bo'lib ishlagan.

2004-yil dekabridan Toshkent davlat texnika universitetida «Ishlab chiqarish jarayonlarini avtomatlashtirish» kafedrasi professori. Doktorlik dissertatsiyasini 2012-yilda himoya qilgan.

So'nggi yillardagi ilmiy maqolalari quritish jarayonlariga bag'ishlangan: don va moyli ekinlarni quritish texnologiyalari va qurilmalari sharhi, baraban tipidagi don quritgichning unumdorligi va energiya samaradorligini oshirish, qaynovchi qatlamda karbamidni quritish va donadorlash jarayonini modellashtirish.