Latif Mahmudov

Latif Mahmudov 1933-yil 1-iyulda Toshkentning Mirobod mahallasida xizmatchi oilasida tug'ilgan. Mirobod temir yo'l maktabi — 40-maktabni 1951-yilda bitirib, O'rta Osiyo davlat universiteti (hozirgi O'zbekiston Milliy universiteti) filologiya fakultetining jurnalistika bo'limiga o'qishga kirgan va 1956-yilda uni tamomlagan.

Mehnat faoliyatini Respublika radiosida boshlagan. 1958-yilda bolalar va o'smirlar uchun eshittirishlarning bosh tahririyati tashkil etilgach, uning bosh muharriri etib tayinlangan va bu lavozimda taxminan yigirma yil — 1978-yilgacha ishlagan. 1979-yildan «Yosh gvardiya» nashriyotida (hozirgi «Yangi asr avlodi») bolalar adabiyoti bo'limiga rahbarlik qilgan.

Qalam tebratishni 1956-yilda boshlagan. U asosan bolalar va o'smirlar uchun hikoya, qissa, pesa va kinossenariylar yozgan; nashr etilgan kitoblari soni o'ttizdan oshadi. Dastlabki kitoblari — «Qadrdon ko'zlar» va «Chinor» 1961-yilda chiqqan, so'ng «Ikki o'rtoq», «Qirg'iy», «Sho'x daryoning siri», «Ikki dangasa sarguzashti», «Jasur bolalar», «Sirli xat», «Eski dutor sirlari» kabi to'plamlar, qissa va romanlari bosilgan.

Dramaturg sifatida «Qirg'iy olib qochgan bola», «Ali-Vali», «Muhim topshiriq», «Sirli xat» pesalarini yaratgan; ular yosh tomoshabinlar teatrlarida qo'yilgan. Bolalar va o'smirlar hayotiga bag'ishlangan asarlari asosida bir necha kinofilm suratga olingan, «Dangasaning holi voy» hikoyasi esa O'zbekiston qo'g'irchoq teatrida sahnalashtirilgan. Asarlari rus, ukrain, belorus, latish, eston, gruzin, ozarbayjon, qozoq, qirg'iz, turkman va tojik tillariga tarjima qilingan.

«Tog'dagi lolalar» kitobi 1984-yilda O'zbekiston Yozuvchilar uyushmasining G'afur G'ulom nomidagi mukofotiga sazovor bo'lgan. 1977-yilda unga O'zbekiston SSRda xizmat ko'rsatgan madaniyat xodimi unvoni berilgan, 2000-yilda esa I darajali «Sog'lom avlod uchun» ordeni bilan taqdirlangan. 2005-yilda «Sevgi desam» kitobi nashr etilgan.