Mahmud Murodov

Mahmud Murodov 1916-yilda Toshkentda tug'ilgan. O'zi eslashicha, maktabda o'qib yurgan paytlari «Olmazor» mahallasidagi choyxonada odamlarga gazeta o'qib bergan, Bahrom Rahmonov bilan birga «Qizil yong'in» to'garagini ochib, A. Ikromov nomidagi klubda tomoshalar ko'rsatgan.

Institutni tugatgunga qadar Toshkentdagi 9- va 17-bolalar uylarida tarbiyachi bo'lib ishlagan. Shu yillarda «Vojatiy» («Rahbar») jurnali bilan hamkorlik qila boshlagan, kichik hikoya va lavhalarini jurnallarda e'lon qilgan — shundan keyin uning ijodiy faoliyati nashriyot va matbuot ishi bilan chambarchas bog'langan.

Murodov tarjimon sifatida ham mehnat qilgan: «Stepan Razin» (1941), «O'rtoqlaring sen bilan» (1951), «Kapitan xonimi» (1959), «Tutqunlikdagi jangchilar» (1964) kabi qissa, hikoya va ertaklarni o'zbek tiliga o'girgan. Bu ish unga adabiy mahorat uchun yaxshi maktab bo'lgan.

1955-yildan «Gulxan» jurnalida, 1958-yildan umrining oxirigacha «G'uncha» jurnalida mas'ul kotib lavozimida ishlagan va bolalar adabiyoti rivojiga hissa qo'shgan.

Yozuvchining kitoblari kam sonli, ammo asosan maktabgacha yoshdagi bolalarga mo'ljallangan: «Yaxshi amaki» (1965), «Eng maza joy» (1969), «Bog'cha bola» (1971), «Ko'prik» (1973), «Kim eng kuchli» (1976), «Sanoq» (1980), «Sirli don» (1987) va boshqalar. «Kaska», «Baxtini topgan Bahriniso», «Kim eng yaxshi?», «Salom, Quyosh bobo!», «Jonli surat» singari hikoya va ertaklari bolalarga tanish hayotiy voqealar asosida yozilgan, ayrimlari boshlang'ich sinf darsliklariga kiritilgan. Mahmud Murodov 1996-yilda vafot etgan.