Маҳмуд Муродов

Маҳмуд Муродов 1916-йилда Тошкентда туғилган. Ўзи эслашича, мактабда ўқиб юрган пайтлари «Олмазор» маҳалласидаги чойхонада одамларга газета ўқиб берган, Баҳром Раҳмонов билан бирга «Қизил ёнғин» тўгарагини очиб, А. Икромов номидаги клубда томошалар кўрсатган.

Институтни тугатгунга қадар Тошкентдаги 9- ва 17-болалар уйларида тарбиячи бўлиб ишлаган. Шу йилларда «Вожатий» («Раҳбар») журнали билан ҳамкорлик қила бошлаган, кичик ҳикоя ва лавҳаларини журналларда эълон қилган — шундан кейин унинг ижодий фаолияти нашриёт ва матбуот иши билан чамбарчас боғланган.

Муродов таржимон сифатида ҳам меҳнат қилган: «Степан Разин» (1941), «Ўртоқларинг сен билан» (1951), «Капитан хоними» (1959), «Тутқунликдаги жангчилар» (1964) каби қисса, ҳикоя ва эртакларни ўзбек тилига ўгирган. Бу иш унга адабий маҳорат учун яхши мактаб бўлган.

1955-йилдан «Гулхан» журналида, 1958-йилдан умрининг охиригача «Ғунча» журналида масъул котиб лавозимида ишлаган ва болалар адабиёти ривожига ҳисса қўшган.

Ёзувчининг китоблари кам сонли, аммо асосан мактабгача ёшдаги болаларга мўлжалланган: «Яхши амаки» (1965), «Энг маза жой» (1969), «Боғча бола» (1971), «Кўприк» (1973), «Ким энг кучли» (1976), «Саноқ» (1980), «Сирли дон» (1987) ва бошқалар. «Каска», «Бахтини топган Баҳринисо», «Ким энг яхши?», «Салом, Қуёш бобо!», «Жонли сурат» сингари ҳикоя ва эртаклари болаларга таниш ҳаётий воқеалар асосида ёзилган, айримлари бошланғич синф дарсликларига киритилган. Маҳмуд Муродов 1996-йилда вафот этган.