Mashrab Boboyev

Mashrab Boboyev 1941-yilda Samarqand viloyatining Payariq tumanida dehqon oilasida tug'ilgan (ba'zi manbalarda tug'ilgan joyi Chelak tumani deb ko'rsatiladi). 1956-yilda o'rta maktabni bitirib, avval kolxozda, so'ng qishloq kutubxonasida ishlagan.

Toshkentga kelib, madaniyat texnikumida, keyin Toshkent teatr va rassomlik institutining aktyorlik fakultetida o'qigan (1960–1965). O'qish bilan birga respublika Xalq ijodiyoti uyida ishlagan, so'ng Samarqandga qaytib, viloyat Xalq ijodiyoti uyida bosh mutaxassis va direktor bo'lgan, viloyat gazetalarida mehnat qilgan.

1967-yilda Toshkentga ko'chib, «Yosh gvardiya» (hozirgi «Yangi asr avlodi») nashriyotida tahrirchi bo'lib ishlagan, keyinchalik G'afur G'ulom nomidagi Adabiyot va san'at nashriyotida, respublika radiosida, «Sharq yulduzi» jurnalida (1992-yildan nasr bo'limi mudiri), Yozuvchilar uyushmasida, teatrlarda adabiy xodim sifatida, Madaniyat ishlari vazirligida repertuar bo'limi mudiri bo'lib ishlagan. Umrining so'nggi yillarida O'zbekiston Milliy axborot agentligida tarjima tahririyatining bosh muharriri bo'lgan.

Matbuotda 1960-yillardan ko'rina boshlagan; birinchi she'riy to'plami «Onamga xat» 1971-yilda chop etilgan. Undan keyin «Bahor kayfiyati», «Kechki trolleybus», «Olisdagi chiroq», «So'z», «Men bilgan sir», «Qani mening yulduzim?», «Nomsiz yulduzlar» kabi o'nlab kitoblari nashr etilgan. «O'ttiz yoshlilar», «Yer tomiri», «Bizning hovli» («Onaizor») va boshqa sahna asarlari respublika teatrlarida qo'yilgan. Navoiyning «Sab'ai sayyor» dostoni asosida «Sevgi nidosi» milliy baleti uchun libretto yozgan, «Ko'ngil ko'chalari» ko'p qismli videofilmining ssenariysi ham unga tegishli.

Boboyev tarjimon sifatida ham ishlagan: A. Pushkin, R. Hamzatov, O. Chiladze she'rlarini, V. Katayevning romanini hamda yigirmadan ortiq dramatik asarni o'zbek tiliga o'girgan. 1995-yilda unga O'zbekistonda xizmat ko'rsatgan madaniyat xodimi unvoni berilgan.

Mashrab Boboyev 2003-yil 23-iyulda Toshkentda vafot etgan.