Munavvara Abdullayeva

Munavvara Abdullayeva 1950-yil 5-aprelda Marg'ilonda ishchi oilasida tug'ilgan. 1966-yilda o'rta maktabni, 1971-yilda Marg'ilon reja-iqtisod texnikumini tamomlagan. Shundan so'ng Toshkentdagi A. N. Ostrovskiy nomidagi teatr va rassomlik institutida «Teatr va kino aktyorligi» yo'nalishida o'qib, 1975-yilda diplom olgan.

Institutdan so'ng bir yil Sirdaryo viloyat musiqali drama teatrida aktrisa bo'lib ishlagan. 1976–1978-yillarda Moskvadagi Lunacharskiy nomidagi davlat teatr san'ati institutida (hozirgi GITIS) pedagogika bo'yicha aspiranturada tahsil olgan, shu yillarda Oleg Tabakov va Vladimir Andreyev kurslarida hamda Andrey Goncharov teatrida amaliyot o'tagan.

1978-yildan Toshkent davlat san'at institutida dars beradi: avval o'qituvchi, keyin dotsent, so'ngra professor. Uning shogirdlari orasida Mirzabek Xolmedov, Madina Muxtorova kabi aktyorlar bor.

Pedagoglik bilan bir qatorda rejissyor sifatida ham ishlaydi: turli teatrlarda qariyb o'ttizta spektaklni sahnalashtirgan. 1989-yildan O'zbek milliy akademik drama teatrida «Chimildiq», «Andishali kelinchak», «Bevalar», «Dadajon demayman» kabi spektakllarni qo'ygan. 1995-yilda Farg'ona rus teatrida Slavomir Mrojekning «Chegaradagi uy» pyesasini sahnalashtirgan. Uning ba'zi asarlari — Uyg'unning «Alisher Navoiy», Abdulla Qodiriyning «Mehrobdan chayon», Xushvaqtovning «Chimildiq» va «Mashrab» spektakllari — mamlakat teatr san'atining oltin fondiga kiritilgan.

Aktrisa sifatida u «Domla», «Kichkina tabib», «Oppoq qushlar», «Ayol», «Osmondagi bolalar» va boshqa filmlarda onalar, ayollar obrazlarini yaratgan.

2000-yilda unga «O'zbekistonda xizmat ko'rsatgan yoshlar murabbiysi» unvoni berilgan. 2023-yil 26-avgustdagi Prezident farmoniga ko'ra, institutning musiqali, dramatik teatr va kino san'ati kafedrasi professori sifatida «Mehnat shuhrati» ordeni bilan taqdirlangan.