Мунаввара Абдуллаева

Мунаввара Абдуллаева 1950-йил 5-апрелда Марғилонда ишчи оиласида туғилган. 1966-йилда ўрта мактабни, 1971-йилда Марғилон режа-иқтисод техникумини тамомлаган. Шундан сўнг Тошкентдаги А. Н. Островский номидаги театр ва рассомлик институтида «Театр ва кино актёрлиги» йўналишида ўқиб, 1975-йилда диплом олган.

Институтдан сўнг бир йил Сирдарё вилоят мусиқали драма театрида актриса бўлиб ишлаган. 1976–1978-йилларда Москвадаги Луначарский номидаги давлат театр санъати институтида (ҳозирги ГИТИС) педагогика бўйича аспирантурада таҳсил олган, шу йилларда Олег Табаков ва Владимир Андреев курсларида ҳамда Андрей Гончаров театрида амалиёт ўтаган.

1978-йилдан Тошкент давлат санъат институтида дарс беради: аввал ўқитувчи, кейин доцент, сўнгра профессор. Унинг шогирдлари орасида Мирзабек Холмедов, Мадина Мухторова каби актёрлар бор.

Педагоглик билан бир қаторда режиссёр сифатида ҳам ишлайди: турли театрларда қарийб ўттизта спектаклни саҳналаштирган. 1989-йилдан Ўзбек миллий академик драма театрида «Чимилдиқ», «Андишали келинчак», «Бевалар», «Дадажон демайман» каби спектаклларни қўйган. 1995-йилда Фарғона рус театрида Славомир Мрожекнинг «Чегарадаги уй» песасини саҳналаштирган. Унинг баъзи асарлари — Уйғуннинг «Алишер Навоий», Абдулла Қодирийнинг «Меҳробдан чаён», Хушвақтовнинг «Чимилдиқ» ва «Машраб» спектакллари — мамлакат театр санъатининг олтин фондига киритилган.

Актриса сифатида у «Домла», «Кичкина табиб», «Оппоқ қушлар», «Аёл», «Осмондаги болалар» ва бошқа филмларда оналар, аёллар образларини яратган.

2000-йилда унга «Ўзбекистонда хизмат кўрсатган ёшлар мураббийси» унвони берилган. 2023-йил 26-августдаги Президент фармонига кўра, институтнинг мусиқали, драматик театр ва кино санъати кафедраси профессори сифатида «Меҳнат шуҳрати» ордени билан тақдирланган.