Odiljon Yusupov

Odiljon Yusupov — o'zbek qo'shiqchisi va sozandasi, katta ashula va maqom ijrochisi, O'zbekiston xalq hofizi. 1928-yil 19-mayda Andijon viloyati Baliqchi tumanidagi Xo'jaobod qishlog'ida tug'ilgan, 1993-yil 4-sentabrda Toshkentda vafot etgan.

Katta ashula va maqom sirlarini Mo'min qori, H. Fozilov, M. Nishonov, Mamatxo'ja eshon, Saidali qori, Shokir qori va Jo'raxon Yusupov kabi ustozlardan o'rgangan, keyinchalik ular bilan birga sahnaga chiqqan. Navoiy, Fuzuliy, Bobur, Mashrab, Yassaviy, Muqimiy, Furqat, Mahtumquli, Haziniy, Habibiy g'azallarini kuylagan; doira, dutor, g'ijjak, tor va tanburda chalgan.

1950–1955-yillarda Norin tumani xalq teatrida xonanda bo'lgan. 1956-yildan Baliqchi tumanida «Zilol» havaskor san'at ansamblini boshqargan (keyinchalik u xalq etnografik ansambli unvonini olgan), shu yili shu tumanda «Tarona» ansamblini ham tashkil etgan — u ham xalq ansambli unvoniga sazovor bo'lgan. 1972-yilda O'zbekiston televideniyesining «Marhabo, talantlar» ko'rsatuvida qatnashgan, 1981-yilda Namangan madaniy-ma'rifiy texnikumini tamomlagan.

1985-yilda shogirdi Nabijon Saidnazarov bilan Yevropa safarida bo'lgan, Italiya, Fransiya va Shveytsariyadagi festivalda ijro etgan. 1990-yilda Baliqchida katta ashula ijrochiligi maktabini tashkil qilgan. Vahobov birodarlari, A. Shokirov, M. Rahmatullayev va o'z o'g'illari Abduvahob, Abdusattor, Zokirjon Odilov kabi bir qancha ijrochilarga ustozlik qilgan.

Uning chiqishlari O'zbekiston milliy teleradiokompaniyasining Oltin fondida saqlanadi; «Ochun», «Odil hofiz», «Meros» videofilmlari mavjud. Unga O'zbekiston xalq hofizi unvoni berilgan. Repertuaridan «Jononim mening», «Sarafroz etgali keldik», «Aylansin ko'ngling», «Qoyilman», «Dugohi Husayniy» qo'shiqlari hamda «Bo'lib dilbar», «Ey sanam» kabi katta ashulalar ma'lum.