Одилжон Юсупов

Одилжон Юсупов — ўзбек қўшиқчиси ва созандаси, катта ашула ва мақом ижрочиси, Ўзбекистон халқ ҳофизи. 1928-йил 19-майда Андижон вилояти Балиқчи туманидаги Хўжаобод қишлоғида туғилган, 1993-йил 4-сентабрда Тошкентда вафот этган.

Катта ашула ва мақом сирларини Мўмин қори, Ҳ. Фозилов, М. Нишонов, Маматхўжа эшон, Саидали қори, Шокир қори ва Жўрахон Юсупов каби устозлардан ўрганган, кейинчалик улар билан бирга саҳнага чиққан. Навоий, Фузулий, Бобур, Машраб, Яссавий, Муқимий, Фурқат, Маҳтумқули, Ҳазиний, Ҳабибий ғазалларини куйлаган; доира, дутор, ғижжак, тор ва танбурда чалган.

1950–1955-йилларда Норин тумани халқ театрида хонанда бўлган. 1956-йилдан Балиқчи туманида «Зилол» ҳаваскор санъат ансамблини бошқарган (кейинчалик у халқ этнографик ансамбли унвонини олган), шу йили шу туманда «Тарона» ансамблини ҳам ташкил этган — у ҳам халқ ансамбли унвонига сазовор бўлган. 1972-йилда Ўзбекистон телевидениесининг «Марҳабо, талантлар» кўрсатувида қатнашган, 1981-йилда Наманган маданий-маърифий техникумини тамомлаган.

1985-йилда шогирди Набижон Саидназаров билан Европа сафарида бўлган, Италия, Франсия ва Швейтсариядаги фестивалда ижро этган. 1990-йилда Балиқчида катта ашула ижрочилиги мактабини ташкил қилган. Ваҳобов биродарлари, А. Шокиров, М. Раҳматуллаев ва ўз ўғиллари Абдуваҳоб, Абдусаттор, Зокиржон Одилов каби бир қанча ижрочиларга устозлик қилган.

Унинг чиқишлари Ўзбекистон миллий телерадиокомпаниясининг Олтин фондида сақланади; «Очун», «Одил ҳофиз», «Мерос» видеофилмлари мавжуд. Унга Ўзбекистон халқ ҳофизи унвони берилган. Репертуаридан «Жононим менинг», «Сарафроз этгали келдик», «Айлансин кўнглинг», «Қойилман», «Дугоҳи Ҳусайний» қўшиқлари ҳамда «Бўлиб дилбар», «Эй санам» каби катта ашулалар маълум.