Sayyora Yunusova

Sayyora Yunusova 1956-yilda Toshkentda tug'ilgan. 1973–1977-yillarda Toshkent teatr va rassomlik san'ati institutida o'qigan va 1977-yildan hozirgacha O'zbek milliy akademik drama teatrida ishlaydi. Teatrning yetakchi aktrisalaridan biri hisoblanadi.

Sahnada 80 dan ortiq obraz yaratgan. Ular orasida «Al-Farg'oniy» spektaklida Firdavs, «Oltin devor»da Zuxra, «Gamlet»da Gertruda, «Zebuniso»da Zebuniso, «Daraxtlar tik turib jon beradi»da Ameliya, «O'tkan kunlar»da O'zbekoyim, «Chimildiq»da qaynona, «Yulduzli tunlar»da Gavharshodbegim, «Alisher Navoiy» va «Jaloliddin Manguberdi» spektakllarida enaga rollari bor. Shuningdek, «Bir koshona sirlari»da Dilora, «Bir qadam yo'l»da Beg'am va Sayyora, «Bor ekanda, yo'q ekanda»da Ertakchi, «Taqdir sinovlari»da Gulsum momo, «Tortardurman jabrimni»da advokat, «Kuzgi maktublar»da Oynisa opa, «Oq kema»da kampir, «Abay»da Oykarim, «Urush odamlari»da Biydi momo rollarini ijro etgan.

Kinoda 40 dan ortiq badiiy film va serialda rol o'ynagan: «Changak» (1989), «Bobur» (1990), «Shaytanat» (1998), «Pari momo» (2000), «Meni yolg'iz qoldirma» (2004), «Suv yoqalab» (2009), «Umid» va «Jasur» (2011), «Ko'rgim keladi» (2014), «Zurriyot» (2017) va boshqalar. Keng tomoshabinga u «Opa-singillar» serialidagi qizlarning onasi Ra'no roli bilan tanilgan. 2025-yilda «Shamsiqamar» va «Farz» filmlarida ham suratga tushgan. Bundan tashqari «Otalar so'zi, aqlning ko'zi» va «Dengizdan tomchi» teleko'rsatuvlarida bir necha rol ijro etgan.

Yunusova dublyaj ustasi sifatida ham ishlaydi. 2000-yilgacha ham kino va multfilm qahramonlariga ovoz bergan; yapon «Oshin» serialining o'zbekcha dublyajida bosh qahramon Oshin va bir qancha boshqa aktrisalarni ovozlashtirgan, bu uning dublyajdagi birinchi serialidir. Koreyaning «Qish sonatasi» seriali dublyajida (2003, 1 TV) ham qatnashgan.

1999-yilda unga «O'zbekiston Respublikasida xizmat ko'rsatgan artist» faxriy unvoni berilgan. 2021-yilda «O'zbekiston Respublikasi Mustaqilligining 30 yilligi» esdalik medali, 2022-yilda «Madaniyat va san'at fidokori» ko'krak nishoni bilan taqdirlangan. O'zbekiston Respublikasi Prezidentining 2026-yil 28-maydagi farmoniga ko'ra «Mehnat shuhrati» ordeni bilan mukofotlangan.