Сайёра Юнусова

Сайёра Юнусова 1956-йилда Тошкентда туғилган. 1973–1977-йилларда Тошкент театр ва рассомлик санъати институтида ўқиган ва 1977-йилдан ҳозиргача Ўзбек миллий академик драма театрида ишлайди. Театрнинг етакчи актрисаларидан бири ҳисобланади.

Саҳнада 80 дан ортиқ образ яратган. Улар орасида «Ал-Фарғоний» спектаклида Фирдавс, «Олтин девор»да Зухра, «Гамлет»да Гертруда, «Зебунисо»да Зебунисо, «Дарахтлар тик туриб жон беради»да Амелия, «Ўткан кунлар»да Ўзбекойим, «Чимилдиқ»да қайнона, «Юлдузли тунлар»да Гавҳаршодбегим, «Алишер Навоий» ва «Жалолиддин Мангуберди» спектаклларида энага роллари бор. Шунингдек, «Бир кошона сирлари»да Дилора, «Бир қадам йўл»да Беғам ва Сайёра, «Бор эканда, йўқ эканда»да Эртакчи, «Тақдир синовлари»да Гулсум момо, «Тортардурман жабримни»да адвокат, «Кузги мактублар»да Ойниса опа, «Оқ кема»да кампир, «Абай»да Ойкарим, «Уруш одамлари»да Бийди момо ролларини ижро этган.

Кинода 40 дан ортиқ бадиий филм ва сериалда рол ўйнаган: «Чангак» (1989), «Бобур» (1990), «Шайтанат» (1998), «Пари момо» (2000), «Мени ёлғиз қолдирма» (2004), «Сув ёқалаб» (2009), «Умид» ва «Жасур» (2011), «Кўргим келади» (2014), «Зурриёт» (2017) ва бошқалар. Кенг томошабинга у «Опа-сингиллар» сериалидаги қизларнинг онаси Раъно роли билан танилган. 2025-йилда «Шамсиқамар» ва «Фарз» филмларида ҳам суратга тушган. Бундан ташқари «Оталар сўзи, ақлнинг кўзи» ва «Денгиздан томчи» телекўрсатувларида бир неча рол ижро этган.

Юнусова дубляж устаси сифатида ҳам ишлайди. 2000-йилгача ҳам кино ва мултфилм қаҳрамонларига овоз берган; япон «Ошин» сериалининг ўзбекча дубляжида бош қаҳрамон Ошин ва бир қанча бошқа актрисаларни овозлаштирган, бу унинг дубляждаги биринчи сериалидир. Кореянинг «Қиш сонатаси» сериали дубляжида (2003, 1 ТВ) ҳам қатнашган.

1999-йилда унга «Ўзбекистон Республикасида хизмат кўрсатган артист» фахрий унвони берилган. 2021-йилда «Ўзбекистон Республикаси Мустақиллигининг 30 йиллиги» эсдалик медали, 2022-йилда «Маданият ва санъат фидокори» кўкрак нишони билан тақдирланган. Ўзбекистон Республикаси Президентининг 2026-йил 28-майдаги фармонига кўра «Меҳнат шуҳрати» ордени билан мукофотланган.