To'lan Nizom

To'lan Nizom (asl ismi Nizomiddinov To'lanboy) 1939-yil 17-avgustda Andijon viloyati Bo'z tumanidagi Beshgul qishlog'ida tug'ilgan. O'rta maktabni bitirgach, Andijon pedagogika institutida o'qigan va uni 1965-yilda tamomlagan.

Uzoq yillar ta'lim va tashkiliy ishlarda band bo'ldi: yoshlar tashkilotlarida rahbar (1965–1976), tuman xalq ta'limi bo'limi mudiri (1976–1983), O'zbekiston Yozuvchilar uyushmasi Andijon viloyat bo'limida mas'ul kotib (1983–1985), so'ngra Bo'z pedagogika bilim yurti direktori (1985–2001) bo'lgan.

Shoirning birinchi to'plami — «Sening ertaklaring» 1970-yilda nashr etilgan. Undan keyin «Iftixor» (1982), «Oy qizlar» (1988), «Muqaddas ruh» (1993), «Vatan tuyg'usi» (1993), «Daqr bog'i» (1995), «Saylanma» (1998) va boshqa she'riy kitoblari chiqdi. 2007–2010-yillarda uch jildlik asarlari — «Avji yoz», «Bahoriy maysalar» va «Zarrin yaproqlar» bosilgan. Bolalar uchun ham she'rlar yozgan.

1990-yillardan boshlab To'lan Nizom lirik-epik janrda samarali ijod qildi. Uning «Cho'lpon», «Majnuntol yig'isi» (Mirtemirga bag'ishlangan), «Ruhi ravonim» (Mashrab haqida), «Botmay qolgan oy» (Usmon Nosir haqida), «Alisher», «Non hidi», «Dovon» (Qamchiq dovoni qurilishi haqida) kabi doston va lirik qissalari bor. Bobur, Cho'lpon, Mirtemir kabi siymolarga murojaat shoir ijodining asosiy yo'nalishlaridan biri bo'ldi.

1998-yilda unga «O'zbekiston xalq shoiri» unvoni berildi. U O'zbekistonda xizmat ko'rsatgan xalq ta'limi xodimi, Cho'lpon va Bobur xalqaro mukofotlari sovrindori; 2003-yilda «Mehnat shuhrati», 2008-yilda «El-yurt hurmati» ordenlari bilan taqdirlangan. To'lan Nizom 2020-yil 10-dekabrda 81 yoshida vafot etdi.