Tolib Karimov

Tolib Karimov (to'liq ismi Tolibjon Raufovich Karimov) 1940-yilda Toshkentda tug'ilgan. 1961-yilda A. N. Ostrovskiy nomidagi Toshkent teatr va rassomlik institutining aktyorlik fakultetini tamomlagan.

Faoliyatini institut yo'llanmasi bilan Qo'qondagi Hamza nomli teatrda boshlagan (1961–1963). U yerda «Hasan-Husan», «Olma gullaganda» va «Serjant militsiyasi» spektakllarida rol o'ynagan.

1963-yildan umrining oxirigacha Hamza nomidagi O'zbek davlat akademik drama teatrida (hozirgi O'zbek milliy akademik drama teatri) ishlagan. Qirqdan ortiq spektaklda bosh rollarni ijro etgan: Yo'lchi («Qutlug' qon»), G'ofur («Boy ila xizmatchi»), Ulug'bek («Mirzo Ulug'bek»), Shoh Ma'mun («Abu Rayhon Beruniy»), Husayn Boyqaro («Alisher Navoiy»), Amir Temur («Sohibqiron Temur»). Mustaqillik yillarida Said Baraka («Sohibqiron»), doktor Tavin («Yetti faryod»), Imom («Bir koshona siri») va Said Obid («Mirzo Ulug'bek») rollarini ijro etgan.

O'zbek televideniyesining o'ttizdan ortiq loyihasida bosh rollarda ko'ringan, «Otalar so'zi — aqlning ko'zi» ko'rsatuvida ishtirok etgan. Kinoda «Sayyod qo'ng'irog'i» (1966), «Oblava na odichavshix sobak» (1990), «Bobur» (1990), «Zastava» (2007) kabi filmlarda suratga tushgan.

1987-yilda O'zbekiston SSR xalq artisti unvoniga sazovor bo'lgan, Hamza nomidagi O'zbekiston SSR Davlat mukofoti laureati, 1997-yilda «Mehnat shuhrati» ordeni bilan taqdirlangan. 2023-yil 19-iyulda Toshkentda 83 yoshida vafot etgan.